Gjermani Ronald Mynsh, rektor i Universitetit të Prizrenit

Pas propozimit të Komisionit Ndërkombëtar për zgjedhjen e rektorit të Universitetit të Prizrenit, ministri i Arsimit, Enver Hoxhaj, emëroi prof. Ronald Mynsh rektor themelues të këtij universiteti. Ministri i Arsimit, Hoxhaj, tha se ligjëratat në Universitetin e Prizrenit do të fillojnë më 1 tetor të këtij viti, ku studentët do të kenë mundësi të studiojnë në gjashtë drejtime. “Universiteti i Prizrenit do të jetë shumë disiplinor për nga mënyra e studimit, shumetnik për nga gjuhët që do të përdoren, do të jetë rajonal për nga studentët që do t’i ketë dhe do të jetë ndërkombëtar në formën e bashkëpunimit të tij. Rektori themelues i Universitetit të Prizrenit gjatë një viti akademik nga një tetori deri në fund të shtatorit 2011 do të jetë rektor themelues”, tha Hoxhaj. Rektori themelues i Universitetit të Prizrenit, Ronald Mynsh, tha se gjatë vitit të parë akademik kanë një agjendë shumë të ngjeshur, e cila përfshinë çdo hap që një universitet i ri duhet të bëjë në fillimet e punës së tij. “Një pjesë e rëndësishme e kësaj agjende është plani pesëvjeçar i punës së Universitetit të Prizrenit. Këtë plan do ta bëjmë së bashku me Ministrinë e Arsimit dhe me Universitetin e Prishtinës, si dhe me kryetarin e Komunës së Prizrenit. Një rektor që vjen nga Gjermania pritet që t’i japë një pamje ndërkombëtare këtij universiteti. Ky universitet do të sigurojë bashkëpunime edhe me shtetet e tjera evropiane”, tha Mynsh. Ambasadori gjerman në Prishtinë, Shtajnbah, shprehu kënaqësinë e tij që rektori themelues i Universitetit të Prizrenit është gjerman.