Kosova Sot
description

Në disa fakultete kanë mbetur vende të lira

Publikuar: E premte 6 Gusht 2010, 9:43 29 Komente

Në Universitetin e Prishtinës (UP) të enjtën janë shpallur rezultatet e provimeve pranuese për vitin e ardhshëm akademik 2010/2011. Në bazë të konkursit sivjet në këtë afat UP-ja ka paraparë t’i regjistrojë 17 mijë e 940 studentët të rinj, prej të cilëve 16 mijë e 327 të rregullt, 1030 studentë me korrespondencë, 341 studentë nga rajoni si dhe 216 studentë nga minoritetet. Konkurrenca më e madhe ka qenë në Fakultetin Ekonomik, në Fakultetin e Mjekësisë, në Fakultetin Juridik, si dhe në Fakultetin e Edukimit, ku janë plotësuar vendet e parapara me konkurs. Ndërkaq, në disa fakultetet të tjera kanë mbetur vende të lira.

Kandidatët të cilët që nga orët e paradites kishin ardhur para fakulteteve të UP-së për të shikuar rezultatet e provimeve pranuese ndiheshin të preokupuar dhe mezi prisnin t’i shihnin rezultatet. Kishte edhe prej atyre kandidatëve të cilët ishin ndarë të zhgënjyer, pasi nuk e kishin kaluar provimin pranues. Mirëpo, sipas drejtuesve të fakulteteve, ata kandidatë të cilët i kanë plotësuar kriteret e parapara me konkurs janë pranuar, por kishte edhe raste të tjera ku kandidati për 1 pikë kishe rënë nga provimi pranues. Në Fakultetin Juridik provimit pranues i janë shtruar mbi 2361 kandidatë, prej të cilëve 1546 kanë aplikuar në Prishtinë, 496 kandidatë në Gjilan dhe 319 në Pejë. Menaxhmenti i fakultetit ka bërë të ditur se në qendrën në Prishtinë në këtë fakultet janë plotësuar të gjitha vendet e parapara me konkurs, kurse kanë mbetur vende të lira në Pejë dhe në Gjilan. “Në bazë të rezultateve të përgjithshme, në afatin e parë në Fakultetin Juridik janë plotësuar të gjitha vendet e parapara me konkurs për studime të rregullta, kurse për studime me korrespondencë kanë mbetur vende të lira. Po ashtu edhe në Fakultetin Ekonomik mësohet se në Prishtinë janë plotësuar të gjitha vendet e parapara me konkurs. “Në Fakultetin Ekonomik në të dy qendrat kanë aplikuar mbi 5 mijë kandidatë, të cilët kanë pretenduar që të bëhen brucoshë. Në Prishtinë janë plotësuar të gjitha vendet e parapa me konkurs për studimet e rregullta, ndërsa në qendrën tjetër në Gjilan kanë mbetur mbi 40% vende të lira”, ka bërë të ditur dekani i Fakulteti Ekonomik, Skender Ahmenti. Ai ka sqaruar se me gjithë konkurrencën e madhe në fakultet janë pranuar vetëm ata kandidatë të cilët i kanë plotësuar kriteret e parapara me konkurs. Vende të lira kanë mbetur edhe në Fakultetin e Shkencave Matematiko- Natyrore -FSHMN. Në këtë fakultet me konkurs është paraparë të pranohen 1505 studentë të rinj, kurse sipas aplikimeve kanë aplikuar vetëm 30 % e kandidatëve nga numri i përgjithshëm. “ Në FSHMN janë shpallur provimet pranuese sipas konkursit të paraparë. Në këtë fakultet për  1505 vende sa janë paraparë me konkurs, kanë aplikuar 424 kandidatë prej të cilëve provimin pranues e kanë kaluar vetëm 238 konkurrues, ose marrë në total për afatin e dytë në këtë fakultet kanë mbetur edhe 1317 vende të lira”, ka bërë të ditur Sekretari i FSHMN-së Haki Mjekiqi

 

Printo Dërgo
  • di





arkivi i lajmeve