UP-ja filloi vitin e ri akademik

Universiteti i Prishtinës ka organizuar ceremoni solemne me rastin e fillimit të vitit të ri akademik, 2010-2011. Me këtë rast, rektori i UP-së, Mujë Rugova, duke vlerësuar angazhimin e stafit dhe studentëve, tha se UP-ja tash e një gjysmëshekulli ka zgjuar ndërgjegjen kombëtare në tërë hapësirën shqiptare, kështu që lirisht mund të thuhet se ka qenë paraprijës i lirisë së Kosovës. “Uroj që këta studentë me punën e tyre ta arsyetojnë vendin e zënë në bankat e këtij universiteti dhe në të ardhmen të jenë bazë e fuqishme për ndërtimin dhe zhvillimin e Kosovës. Puna e tyre në të ardhmen do të krijojë rrugë dhe mundësi të reja për gjeneratat që vijnë”, tha rektori Rugova. Ndërsa ministri i Arsimit, Enver Hoxhaj, theksoi se fillimi i vitit të ri akademik është një ngjarje me rëndësi për Kosovën, pasi që tetori dhe fillimet e viteve akademike kanë qenë të ndryshme, që, sipas tij, ishin nganjëherë të okupuar, nganjëherë me protesta, e nganjëherë filluan nëpër shtëpi private.“Universiteti i Prishtinës këtë vit ka marrë një vendim të rëndësishëm, që të rritë numrin e studentëve të rinj, pra ka ofruar 20 mijë vende për brucoshët e rinj dhe kjo flet për një përfshirje të cilën e ofron UP-ja për qytetarët e Kosovës”, tha kreu i MASHT-it.