Editoriali: Për pataten dhe ekonominë e tregut

Publikuar: E marte 3 Prill 2012, 19:32 0 Komente

Ekonomia e tregut është e garantuar me kushtetutën e Republikës së Kosovës. Kjo vlen, sigurisht edhe në rastin e patateve. Në tregun e lirë, që supozohet pra të jetë edhe në vendin tonë (jo rrallë rregullat e lojës shkelen), çmimin e përcaktojnë kërkesa dhe oferta. Në çdo shtet, qeveritë përkatëse mund të marrin masa mbrojtëse ndaj prodhimeve vendase. Këtë e ka bërë Shqipëria në rastin e prodhuesve të patates, duke ngritur çmimin e referencës, që së fundmi u ul sërish. Prodhuesit kosovarë janë frustruar pasi u mbetën stoqet dhe nuk po arrijnë t’i shesin prodhimet e tyre. Por, ky është biznes dhe nuk kemi pse të mbështetemi te kurrfarë ndjenje patriotike. Qeveria kosovare duhet t’i ketë gjithnjë të gatshme masat e reciprocitetit dhe të mbrojë prodhuesit me të gjitha mundësitë ligjore që i ka në dispozicion. Politika tregtare e qeverisë shqiptare ndaj Kosovës në rastin e patateve sigurisht që nuk është e mirë, por ky nuk është justifikim për të derdhur mijëra kilogramë në sheshin “Nëna Tereza”, siç kanë paralajmëruar se do të bëjnë fermerët. Fundja, më mirë është t’u dhurohen spitaleve, mensave publike, të varfërve, sesa të hidhen kot në rrugë. Ky akt nuk do të ndërronte asgjë. Tashmë, Shqipëria e ka rikthyer çmimin e referencës në nivelin e mëparshëm dhe ka shterur arsyeja për të protestuar në një formë të tillë. Fermerët, por jo vetëm ata, prodhuesit vendorë në përgjithësi duhet të ulen me qeverinë dhe të gjejnë mënyrat më të dobishme që prodhimi vendas të mos mbetet stok. Kosova ka një deficit tregtar mbi dy miliardë euro në vit, prandaj nëse veprohet drejt, prodhimi vendor, në këto kapacitete, nuk mund të mbetet i pashitur. Problemi me pataten, apo edhe me produktet e tjera kosovare, është i brendshëm dhe si i tillë duhet zgjidhur me mençuri, jo me performanca të padobishme hedhjesh në rrugë.

Komente


arkivi i lajmeve

te fundit