8 milionë euro, për mirëmbajtjen e rrugëve

Bllokada pothuajse totale e shumicës së rrugëve të Kosovës sikur i ka zgjuar nga gjumi qytetarët dhe njohësit e fushës së mirëmbajtjes së rrugëve. Madje, sipas tyre, miliona euro që po shpenzohen nga kompanitë private për mirëmbajtjen e rrugëve pastrimi i tyre nuk kënaq. Ndërsa, si zgjedhje që ata ofrojnë në mënyrë që një dukuri e tillë negative mund të ndërpriten kjo mund të bëhet vetëm nëse në të ardhmen pastrimi i rrugëve magjistrale dhe rajonale do të bëhej vetëm përmes partneritetit publiko-privat. Këshilltari i ministrit të Ministrisë së Infrastrukturës, Lah Nitaj, ka thënë se në kapitalizëm shteti nuk është institucioni që e bënë themelimin e kompanive, por janë bizneset private ato që i themelojnë dhe përkujdesen për mirëmbajtjen e rrugëve nëpërmes të tenderëve të ofruar nga Qeveria Qendrore dhe lokale. Sipas këshilltarit, Nitaj, vetëm sivjet për mirëmbajtjen e rrugëve magjistrale dhe regjionale të Kosovës janë shpenzuar hiq më pak se 8 milionë euro, mirëpo, e veçanta është se kjo shumë është për 2 milionë euro më e vogël se në vitin 2010. Nitaj ka njoftuar se me gjithë reshjet pandërprera të gjitha rrugët magjistrale - rajonale të Kosovës kanë qenë të qarkullueshme.