AAK-ja mirëpret shkarkimin e dy zyrtarëve të lartë

Agjencia Kundër Korrupsionit ka mirëpritur vendimin e Qeverisë për shkarkimin nga detyra të dy zyrtarëve, Elez Hajdari, anëtar i Bordit të drejtorëve të ndërmarrjes Publike “Hidrodrini” në Pejë dhe Smajl Jonuzaj, anëtar i Bordit të drejtorëve në Korporatën Energjetike të Kosovës (KEK), për shkak të gjendjes së konfliktit të interesit. Ky vendim i Qeverisë ka ardhur pasi që AKK-ja kishte bërë kërkesë për shkarkimin e tyre, në ndërkohë që dy zyrtarët e lartë në asnjë mënyrë nuk i janë bindur kërkesave të agjencisë që të shmangen nga konflikti i interesit. Elez Hajdari, ushtronte postin e anëtarit të Bordit të drejtorëve ndërmarrjen “Hidrodrini” dhe ishte përgjegjës i sektorit të furnizimit me ujë dhe kanalizime, në njësinë operative në Istog. Smajl Jonuzaj, mbante postin e anëtarit të Bordit të drejtorëve dhe ishte person i autorizuar të bizneseve private, “Kabe Group” sh.p.k. dhe N.P.”Comel”.