çdo vit shkatërrohen 500 hektarë tokë

Kosova është nën minimumin ekzistencial të tokës bujqësore për banor, çfarë paraqet rrezik për sigurimin e ushqimit në të ardhmen. Në dekadën e fundit, vetëm brenda një viti shkatërrohen rreth 500 hektarë tokë bujqësore, të cilat janë shndërruar në tokë ndërtimore, thonë zyrtarë qeveritarë dhe ekspertë të bujqësisë.

Procesi i shkatërrimit dhe dëmtimit të tokës bujqësor, sipas tyre, paraqet problem shqetësues për sigurimin e ushqimit në të ardhmen. Ilaz Gashi, shef i divizionit për tokë bujqësore në Ministrinë e Bujqësisë, Pylltarisë dhe Zhvillimit Rural, tha se sipërfaqja e tokës së punuar është mjaft e ulët, llogaritet të jetë rreth 0.15 hektar për kokë banori, ndërkaq sipas standardeve ndërkombëtare, minimumi ekzistencial për prodhimin e ushqimit të mjaftueshëm, është 0.17 hektar për kokë banori. Ndërsa, sipas disa statistikave të Ministrisë së Bujqësisë, 200 mijë familje ose rreth një milion banorë tani janë duke jetuar në shtëpi të reja në tokat bujqësore të ndërtuara pas vitit 1999.