I shtohen akuzat guvernatorit

Shtohen edhe dy akuza ndaj Hashim Rexhepit, guvernator i Bankës Qendrore të Kosovës (BQK). Akuzat kanë të bëjnë me abuzim të pozitës zyrtare dhe marrje të ryshfetit. Kjo çështje sipas zyrtarëve të EULEX-it ka të bëjë me lëshimin e licencave të punës të kompanive të sigurimit gjatë periudhës 2006-2008. “ Të enjten, Prokuroria Speciale e Kosovës ka zgjeruar hetimin ndaj guvernatorit të Bankës Qendrore të Kosovës me akuza shtesë: "Abuzimi i pozitës zyrtare" dhe "Marrje e ryshfetit". Çështja ka të bëjë me lëshimin e licencave të punës të kompanive të sigurimit gjatë periudhës 2006-2008”, tha Blerim Krasniqi, zëdhënës i EULEX-it. Rexhepi në periudhën 2006-2008 ka qenë në pozitën e mbikëqyrësit financiar. Rexhepi është arrestuar javën e kaluar, kur edhe i është caktuar masa e paraburgimit prej 30 ditësh, në seancën paraprake e cila është mbajtur në Gjykatën e Qarkut në Prishtinë, të shtunën e kaluar. Rexhepi është nën hetime që nga viti 2008 për vepra penale për keqpërdorim të detyrës zyrtare, si dhe shpëlarje të parave. Hetimet për Rexhepin është duke i udhëhequr prokurori i Prokurorisë Speciale të Kosovës, Nazmi Mustafai.