KEK-u shpall gjendje të jashtëzakonshme

KEK-u njofton se është duke bërë të pamundurën që të ketë furnizim sa më të mirë me energji elektrike. Sipas zyrtarëve të kësaj kompanie, moti i ftohtë që nuk mbahet mend gjatë 3 dekadave të fundit e ka vështirësuar prodhimin e energjisë elektrike në blloqe, sikur kërkesa është në maksimumin e saj. Zëdhënësi i KEK-ut, Viktor Buzhala, ka njoftuar nëpërmjet një komunikate se në sistem janë pesë blloqe, por disa stabilimente kanë vështirësi të funksionimit si pasojë e acarit. Në anën tjetër, opsioni importit është i kufizuar, pasi ka pengesa nga Serbia, përkatësisht kompania EMS, në linjat e transmisionit që nuk janë përgjegjësi e KEK-ut. “Përpos pengesave nga Serbia, ka mungesa të theksuara të energjisë elektrike edhe në rajon, që është duke u ballafaquar me situatë të ngjashme atmosferike dhe atë të furnizimit me energji. Pavarësisht kësaj, KEK-u ka arritur të sigurojë import shtesë, por është e pamundur të mbulohet e tërë kërkesa që ka arritur në 1 300 megavat/orë”, theksohet në njoftim. “Në një situatë të tillë, KEK-u e ka shpallur gjendjen e jashtëzakonshme dhe të gjithë punëtorët e korporatës në të gjitha divizionet janë në gatishmëri gjatë 24 orëve dhe po e japin maksimumin e tyre, aty ku është e nevojshme që gjendja të jetë sa më stabile”, ka treguar Buzhala. Sipas tij, është duke u intervenuar në çdo problem që po paraqitet në kohën më të shkurtër të mundshme, por kushtet atmosferike dhe rrethanat tjera të përmendura më lart po e vështirësojnë gjendjen e furnizimit”, tha ai. Përkundër këtyre rrethanave, falë angazhimit maksimal të punëtorëve, KEK-u zotohet se situata me furnizim të energjisë do të mbahet stabile. Si do që të jetë, për ta tejkaluar këtë gjendje sa më shpejt dhe sa më lehtë, KEK apelon për kursim maksimal të energjisë elektrike.