Kundërshtohet privatizimi i KEK-ut

Privatizimi i KEK-ut duhet të bllokohet me çdo kusht, thanë pjesëmarrës të një tryeze që u organizua nga Grupi Parlamentar i Lëvizjes “Vetëvendosje”. Sipas tyre, procesi i privatizimit në përgjithësi nuk po i sjell kurrfarë dobie zhvillimit ekonomik të vendit. Në kohën kur e tërë bota po bën përpjekje për t’i ruajtur ndërmarrjet që janë fitimprurëse për një shtet, në Kosovë ndodh e kundërta. Kështu u tha në tryezën me temën “Ruajtja e pronësisë publike mbi rrjetin e distribucionit të energjisë dhe rreziqet e privatizimit”, organizuar nga Grupi Parlamentar i Lëvizjes “Vetëvendosje!”. Kryetari i këtij grupi, Visar Ymeri, tha se vullneti i pushtetit aktual për të zhbërë të vetmen njësi vendore që prodhon me sukses, është skandaloz. “Kahun të cilin po e ndërmerr Qeveria tash do t’i sjellë Kosovës më shumë probleme dhe humbje se sa përfitime, qoftë Kosovës si shtet, apo si shoqëri. Prandaj, është e domosdoshme që të reagojmë të gjithë njëzëri, në mënyrë që të mos e lëmë këtë vendim kaq të rëndësishëm vetëm në duart e Qeverisë”, tha Ymeri. Ndërkaq, përfaqësuesi i Sindikatës së Pavarur të Energjetikës së Kosovës, Izet Mustafa, tha se me privatizimin e Divizionit të Furnizimit dhe Rrjetit, jo vetëm që dëmtohet ekonomia e Kosovës, por rrezikohen të mbeten pa punë edhe rreth 2 500 punëtorë.