Në “Llamkos” investohen edhe 30 milionë euro

Në selinë e Odës Ekonomike të Kosovës, të premten, ka qëndruar menaxhmenti i kompanisë “Llamkos GalvaSteel”, z. Arten Bajrushi me bashkëpunëtorë, i cili u prit nga kryetari i OE-së, Safet Gerxhaliu. Në takim u debatua për efektet pozitive në aspektin social që ka arritur menaxhmenti i ri nëpërmjet punësimit të një numri të konsiderueshëm të punëtoreve, ku për momentin punojnë mbi 350 punëtorë dhe pritet së shpejti ky numër të rritet në 437 - sipas kushteve të parapara në procesin e privatizimit. Pas një fillimi të suksesshëm të linjës së prodhimit të llamarinës së zinkuar, kompania “Llamkos GalvaSteel” e ka angazhuar kompaninë italiane “Danieli” për ta kryer një studim të fizibilitetit rreth fillimit të ndërtimit të fabrikës së re - linjës së plastifikimit - që është edhe një dëshmi e seriozitetit të kompanisë “Llamkos GalvaSteel”, pronar i së cilës është kompania “Core Group”, me seli në Dubai. Kryetari Gërxhaliu e falënderoi menaxhmentin dhe tha se është i impresionuar me përkushtimin e tillë që është duke bërë “Core Group” nëpërmjet “Llamkos GalvaSteel”, por edhe menaxhmentit aktual. Gërxhaliu e inkurajoi menaxhmentin në fjalë të qëndrojë i gatshëm në përmbushjen e obligimeve të tyre, por në të njëjtën kohë e vlerësoi lart angazhimin e kompanisë DANIELI në hartimin dhe implementimin e vizionit të ri në kuadër të “Llamkos GalvaSteel” në zgjerimin e kapacitete prodhuese të produkteve të reja me teknologji moderne, ku vlera e këtij projekti do të jetë mbi 30 milionë euro, si dhe do të krijohen 200 vende të reja të punës.