Qeveria ndihmon Termokosin me tre milionë euro

Qeveria e Republikës së Kosovës përmes Ministrisë së Zhvillimit Ekonomik gjatë këtij viti do të subvencionojë “Termokosin” me 3 milionë euro, thuhet në njoftimin për medie të MZHE-së. Pavarësisht se bëhet fjalë për ndërmarrje publike, në pronësi të Komunës së Prishtinës, Termokos edhe gjatë vitit të kaluar, nga Qeveria e Kosovës ka marrë subvencione në vlerë prej 1 525 000 euro, prej të cilave, para vitit të ri, në kohën kur kanë filluar ngricat, janë paguar 904 000 euro.

“Nga mjetet e ndara për vitin 2012 më 13 shkurt në llogarinë e Termokos-it janë bartur 1 463 000 euro, ndërsa deri në fund të këtij muaji do të paguhen 540 000 euro. Do të thotë se subvencionet vetëm në këtë muaj arrijnë shumën prej 2 milionë eurosh”, thuhet në një komunikatë të Ministrisë së Zhvillimit Ekonomik. Pjesa tjetër e subvencionit për Termokos në shumën prej 1 milion euro do të paguhet në vjeshtën e këtij viti. Referuar shënimeve të dhëna nga MXHE, subvencionet nga buxheti i Republikës së Kosovës për këtë kompani në këtë viti janë rritur 100 për qind.