USAID-i mbështet 18 ndërmarrës të rinj

USAID-i ka ndarë në Prishtinë grantet për 18 ndërmarrës të rinj, në mesin e të cilëve kishte shqiptarë, serbë dhe pjesëtarë të grupeve të tjera etnike që jetojnë në Kosovë, duke certifikuar kështu grupin e parë të fituesve të grantit që janë bërë partnerë të USAID-it për ndërmarrësit e rinj. Ky projekt ka për qëllim të zhvillojë ide e të rinjve për biznesin në praktikë. Grantet janë ndarë për të rinj me ide në sektorët e arsimit, konsultimeve për biznese dhe shërbimeve të dizajnit, teknologjisë informative e ide të tjera për biznes. Përfaqësues të USAID-it nëpërmes drejtoreshës, Mauren Shaukent, kanë thënë se me popullatën e re Kosova është vitale të investojë në mbështetjen e ideve të të rinjve për të zhvilluar biznese të reja. Ndërkaq, zëvendëskryeministrja dhe ministrja e Industrisë dhe Tregtisë Mimoza Kusari-Lila dhe ministri i Rinisë e Sportit, Memli Krasniqi, e kanë mirëpritur këtë iniciativë për ndërmarrësit e rinj. Ata thanë se janë idetë ato që kanë vlera sot. Ndërkaq në emër të përfituesve ka falënderuar njëra nga kandidate, Ardijana Balaj, e cila ka falënderuar në emër të kolegëve për ndihmën që u kanë ofruar atyre në hapjen e bizneseve të tyre. Përveç këtyre granteve, USAID-i ka bërë të ditur se janë edhe 200 ndërmarrës të tjerë, duke përfunduar planet e tyre të biznesit dhe të cilët në një të ardhme të afërt do të marrin grantet e tyre. 18 grantet e para kapin shumën e 103 mijë e 109 dollarë amerikanë. Agjencia e SHBA-së për Zhvillim Ndërkombëtar është duke ofruar ndihmë ekonomike dhe humanitare në mbarë botën për më shumë se 40 vjet.