Merrni masa ndaj konsumit të sheqerit

Një lugë sheqer është në gjendje të ndryshojë përmbajtjen e medikamenteve mjekësore. Sheqeri po ashtu mund të ndikojë edhe në rritjen e shtypjes së gjakut dhe të sasisë së kolesterolit, duke rritur mundësinë që shumë persona të kenë probleme në mëlçi, apo shqetësime kardiake dhe diabetike. Sheqeri dhe shumë produkte të tjera të ëmbla, faktikisht konsiderohen aq të helmuara për trupin e njeriut, saqë në mbarë botën duhet të miratohen ligje të ashpra kundrejt tij, ashtu siç bëhet dhe me alkoolin. Kjo është teza e një studimi të publikuar kohët e fundit në revistën "Nature", i cili është drejtuar nga hulumtues të universitetit të Kalifornisë. Ekspertët janë shprehur pro për sa u përket futjes së rregullave të shumta në drejtim të këtij produkti, ku kërkohet që pijet dhe ushqimet që kanë përmbajte sheqeri të kenë taksa të shtuara dhe gjithashtu të ndalohet shpërndarja e këtyre produkteve pranë shkollave. Edhe pse ky propozim mund të duket paradoksal, sërish studiuesit kanë cituar hulumtime dhe statistika të shumta për të mbështetur faktin se sheqeri është i rrezikshëm në të njëjtën shkallë me alkoolin apo madje edhe me duhanin. Një tjetër efekt anësor tepër i dëmshëm për shëndetin e njeriut, që vjen si rrjedhojë e "abuzimit" me sheqerin, është mbipesha.