KosovaSot
description

Maksim Mero do ta bëjë shtatoren e dëshmorit Rexhep Bislimi

Publikuar: E marte 19 Korrik 2011, 21:12 0 Komente

Skulptori nga Shqipëria, Maksim Mero është shpallur fitues i konkursit mbarëkombëtar për ngritjen e shtatores së dëshmorit të kombit, Rexhep Bislimi. Bëhet e ditur se konkursi tashmë është mbyllur dhe juria profesionale pesë-anëtarëshe, në përbërjen e së cilës ishin edhe tre profesorë të Universitetit të Prishtinës. Shefi i Zyrës së Prokurimit në komunën e Ferizajt, Abdurrahman Uruçi tha se përzgjedhja e skulptorit Maksim Mero nga Shqipëria për ta punuar këtë vepër është bërë nga komisioni prej pesë anëtarëve. “Sa i përket përzgjedhjes, ne në fillim kur e kemi bërë publikimin e kemi pasur detyrë që pa marrë parasysh çmimin, të bëhet diçka e mirë dhe e bukur. Prandaj, kur e kemi bërë publikimin, 80 për qind të vlerës së pikëve i kemi dhënë vlerës artistike, ku kemi pasur si qëndrim që ta bëjmë një komision profesional me profesorë të Fakultetit të Arteve në Prishtinë për ta arritur qëllimin, le të fitojë më i mirë dhe më kualitativi. Kemi formuar komisionin prej pesë anëtarëve në bazë të ligjit të prokurimit, ku një anëtar duhet të jetë i Zyrës së prokurimit, një prej shoqatave të dala nga lufta dhe, tre anëtarë profesorë të Fakultetit të Arteve”, shprehet Uruçi. Zyra e Prokurimit e komunës së Ferizajt, tanimë ka bërë publikimin e këtij vendimi dhe presin që brenda 10 ditëve a do të ketë ankesa apo jo, ku më pas do hartohet kontrata për realizimin e shtatores së dëshmorit të Ushtrisë Çlirimtare të Kosovës, Rexhep Bislimi, e cila është paraparë të vendoset në sheshin e qytetit “Adem Jashari” në Ferizaj. Shefi i Zyrës së prokurimit, Abdurrahman Uruçi thotë se komisioni për vlerësim të veprës në fjalë, në vend të parë vendosi skulptorin Maksim Mero, duke e shpërblyer me shumën prej 42 mijë eurove, kurse për kontributin e dhënë në këtë drejtim do t’i shpërblejë edhe dy skulptorët nga Kosova: Milot Mustafën dhe Ylber Krasniqin me nga 2000 dhe 1500 euro”.

Printo Dërgo
  • di

Komente


arkivi i lajmeve