KosovaSot
description

Turqia po e përtërin Perandorinë Otomane

Publikuar: E enjte 18 Prill 2013, 1:55 0 Komente

Pothuajse që nuk ka shtëpi në rajon në të cilën dikush nga banuesit nuk e ka shikuar së paku një prej shumë serive televizive turke. Janë interesante, të natyrës profesionale dhe shumë të afërta me mentalitetin tonë. Ato seri janë vetëm një element, edhe pse jo i vogël, i zgjerimit të ndikimit të Turqisë në rajon. E përditshmja britanike ‘The Guardian’ ka publikuar një tekst në të cilin thuhet sesi Turqia në Ballkan do që ta krijojë një version të “butë” të pushtimit otoman, përkatësisht që e do një prani të fortë dhe të prekshme në atë rajon, e cila do t’i shërbente si rrugë që do t’ia hapë dyert e Bashkimit Evropian. Por në këtë betejë nuk përdoren dhuna dhe armët, por ekonomia dhe kultura. “Diplomacia turke dëshiron që t’ i përtërijë disa lidhje që kanë ekzistuar në të kaluarën, por këtë assesi nuk do ta quaja krijimin e një varianti të ri të “butë” të Perandorisë Otomane. Prania ekonomike dhe kulturore e Turqisë në Kroaci ende nuk është dominuese. Ekzistojnë trendë pozitivë, po rritet këmbimi tregtar dhe po mbërrijnë investime të reja, por të gjitha këto janë shumë larg prej asaj që mund të arrihet”, ka thënë Goran Beus Rihemberg, kryetar i Shoqatës për Miqësi Kroato-Turke dhe ka shtuar se si dy shtetet që nga viti 1991 ndërtojnë marrëdhënie të mira të partneritetit dhe që të gjitha rrethanat kulturore dhe historike shkojnë në favor të atij procesi.

 

Shtetet e rajonit,

sferë interesi

Ekonomia turke, sipas Rihembergut, është e madhe dhe e fuqishme sa që vitin e shkuar Turqisë i është dashur ta vendosë nën kontroll rritjen e bruto produktit vendor (BPV). Turqia gjithashtu investon në shtete të tjera për ta ruajtur stabilitetin ekonomik, ndërsa sferë e interesit janë shtetet ballkanike, shtetet ku flitet turqishtja dhe Lindja e Mesme. Përveç kësaj, Turqia investon shumë edhe në shkollim, për të cilin ndan 17 për qind të BPV-së! Ankaraja në Kroaci kryesisht investon në turizëm dhe financa. Interes i madh është treguar për turizmin nautik, por edhe për hotele. Kroacia do të dëshironte më shumë bashkëpunim në nivelin industrial. “Blerësit nga Turqia do të blinin të gjitha delet dhe dhitë që kemi rritur këtu, por problemi është se ne nuk i rrisim dhe nuk kemi çfarë t’u shesim. Nga ata mund të mësojmë shumë edhe për bujqësinë. Edhe pse të gjithë mendojnë që rajoni rreth Antalisë kryesisht fiton nga turizmi, është fakt që madje gjysma e të ardhurave realizohen në bujqësi. Nën serra, në atë rajon, gjenden rreth 30 mijë hektarë. Kultivojnë fidanë, lule dhe perime, e kush janë blerësit, dihet një vit më parë. Nga kjo mirë jetojnë rreth 60 mijë familje. Përvojat e tilla janë të çmuara për ne”, ka thënë Beus Rihemeberg. “Seritë e kanë luajtur një rol të madh, sepse kemi mësuar se si jetojnë njerëzit në atë shtet. Njëkohësisht kanë ndihmuar në thyerjen e disa paragjykimeve të rrënjosura që i kemi pasur ne për turqit. Tani e shohim se bëhet fjalë për një popull i cili është shumë i afërt me ne edhe sa i përket mentalitetit por edhe emocioneve”, ka shtuar ai.

 

Forcohet prania në Bosnjë

Derisa për shumicën e shteteve të botës, Bosnjë-Hercegovina është gjithnjë e më pak interesante në aspektin ekonomik dhe politik, Turqia haptas është duke e forcuar praninë e saj në atë shtet. Forcimi i ndikimit turk është i dukshëm në fusha të ndryshme, nga politika dhe ekonomia deri te shkollimi, kultura, turizmi dhe mediet. Në aspektin politik, të dukshme janë vizitat e shpeshta të zyrtarëve më të lartë shtetërorë, por edhe vizitat që ia bëjnë Turqisë politikanët boshnjakë. Ekonomia është hallka më e dobët në ato përpjekje të Turqisë. Me një shumë që nuk kalon 15 milionë euro në vit, Turqia është në vendin e nëntë në listën e shteteve që investojnë në Bosnje dhe Hercegovinë.

Printo Dërgo
  • di

Komente


arkivi i lajmeve