Supervjedhje e bankomatëve në Japoni: 13 milionë dollarë për 3 orë

1.4 miliardë jen ose 13 milionë dollarë u vodhën nga makineritë automatike të parave apo ATM-të në Japoni.

Mësohet se keqbërësit arritën të tërheqin shumën e jashtëzakonshme duke përdorur karta krediti të rreme të prodhuara me të dhëna të vjedhura nga një bankë afrikano-jugore.

Policia japoneze tha se paratë u tërhoqën në më pak se 3 orë nga 1400 dyqane në të gjithë Japoninë.

Kryesisht tërheqjet u bënë në ATM-të që gjenden në dyqanet e kompanisë “7eleven”, e cila ndryshe nga bizneset e tjera në Japoni, pranon karta kreditit të huaja.

Banka afrikano-jugore “Standard”, nga e cila u vodhën të dhënat, tha se humbjet e saj arrijnë në thuajse 20 milionë dollarë.

Policia japoneze tha se dyshon që në këtë grabitje janë përfshirë më shumë se 100 njerëz në të gjithë Japoninë.

Një organizim perfekt dhe i paprecedent i një ushtrie hajdutësh që ka zënë në befasi policinë japoneze.

Hetuesit japonezë thanë se është e pabesueshme se si kaq shumë njerëz mund të angazhohen për një komplot kriminal dhe të mos merret vesh asgjë.

Për të ilustruar më mirë organizimin e jashtëzakonshëm, hetuesit thanë se shuma maksimale që mund të tërhiqet nga ATM-të është 913 dollarë dhe hajdutëve i është dashur të bëjnë rreth 14 000 transaksione në më pak se 3 orë.

Policia tashmë ka nisur të shqyrtojë pamjet e kamerave të sigurisë në qindrat e dyqaneve në vend, por ende nuk ka raporte për të dyshuar apo të ndaluar.

(Kosova Sot)