Fërkimet në komuna, shenjë krize e koalicionit

Analistët: Qeveria i ka ditët e numëruara.

"Është në interesin e PDK-së ta prishë koalicionin me LDK-në dhe të shkojë në zgjedhje sa më parë. Por, Kadri Veseli, për dallim nga Hashim Thaçi, që e ka merak protagonizmin dhe i merr përsipër mbi vete edhe gjërat që nuk i bën vetë, bën që punët të shkojnë natyrshëm, duke bërë që të tjerët të marrin rolin e protagonistit, e ai apo partia e tij të marrin benefitin", theksoi analisti Nexhmedin Spahiu, shkruan sot Gazeta Kosova Sot

Acarimet e fundit të raporteve në mes të partnerëve të koalicionit qeverisës, PDK dhe LDK, në nivelin qendror dhe lokal, e veçmas pas prishjes së koalicionit në komunën e Pejës dhe situatën e tensionuar me plot kritika reciproke në Ferizaj analistët politikë po e shohin si një pikë kritike, e cila gjithsesi do të ndikojë edhe për futjen e shpejtë të virusit të përçarjes së madhe, për prishje të koalicionit edhe në nivelin qendror. Kjo situatë e re e krijuar, e cila e çon vendin drejt zgjedhjeve të jashtëzakonshme, sipas opinionistëve, më së shumti i konvenon, për të mos thënë është edhe skenar i përgatitur nga vetë PDK-ja, së cilës i shkon më së tepërmi përshtati prishja e koalicionit në nivelin qendror dhe zgjedhjet e reja.

Këtë mendim e ndan analisti politik Nexhmedin Spahiu. "Natyrisht, është në interesin e PDK-së ta prishë koalicionin me LDK-në dhe të shkojë në zgjedhje sa më parë. Por, Kadri Veseli, për dallim nga Hashim Thaçi, që e ka merak protagonizmin dhe i merr përsipër mbi vete edhe gjërat që nuk i bën vetë, bën që punët të shkojnë natyrshëm, duke bërë që tjerët të marrin rolin e protagonistit, e ai apo partia e tij të marrin benefitin. Kështu në opinion do të dalë që LDK-ja po e prish koalicionin. Le të pyesim pra vallë a nuk i ka shkarkuar Gazmend Muhaxheri drejtorët e PDK-së?, por përfituese e këtyre veprimeve do të jetë PDK-ja", tha analisti Spahiu. Dalja e Qeverisë nga kontrolli kryeministror Spahiu theksoi se nuk ka asnjë gjasë që të pritet nga dikush që një ditë të dalë në konferencë për medie Kadri Veseli dhe të kumtojë se po prishet koalicioni me LDK-në, sepse LDK-ja do të vetë- dorëzohet. "Thjesht, ai do të jetë i durueshëm derisa të jetë evidente se Isa Mustafa nuk e mban dot Qeverinë.

Ta shikojmë ta zëmë punën e ministrit të Jashtëm. Kadriu e ka thënë publikisht se Enver Hoxhaj do të jetë ministër i Jashtëm, për t'u bërë edhe më serioz në këtë punë Enverin e ka bërë zëvendëskryetar të partisë, por Kadriu nuk i thotë dy herë Isës hajde emëroje ministrin e Jashtëm çfarë po pret. Nesër, pasnesër mund të japë dorëheqje ndonjë ministër i PDK-se për ndonjë arsye, pastaj ndonjë tjetër, derisa Isa t'i çojë vetë duart nga pamundësia e drejtimit të Qeverisë", tha Spahiu për "Kosova Sot". Edhe analisti Adlum Ramadani konsideron se qëndrueshmëria e koalicionit qeverisës është thuajse në pikën më kritike që nga marrja e përbashkët e timonit për të udhëhequr."Këto lëvizje mes grupeve të caktuara, të cilat nuk janë të pakta në numër, jo vetëm se po e dëmtojnë koalicionin, por njëkohë- sisht janë duke ia shkurtuar jetëgjatësinë bashkëqeverisjes", tha Ramadani. Sipas tij, nëse analizojmë ndryshimet e fundit brendapartiake dhe deklarimet publike të zyrtarëve politikë të koalicionit PDK-LDK, atëherë mund të arrijmë në përfundim se kjo bashkëqeverisje fundin e saj do ta shohë më së largu tek pranvera e 2017-s. "Ambienti politik përbrenda subjekteve të lartcekura ka filluar që gradualisht të shpërfaqë në skenë edhe demokracinë e brishtë të tyre, e cila është duke ushqyer interesat klienteliste përbrenda dhe jashtë subjektit", theksoi Ramadani.

As vetë partnerët nuk e duan koalicionin Për analistin Blerim Burjani, koalicioni ka qenë i panatyrshëm që nga fillimi dhe pothuajse vazhdimisht ka pasur fërkime e përplasje si në nivelin lokal edhe atë qendror, mirëpo mbijetesa e tij po "telekomandohet" nga ndërkombë- tarët. "Unë kam thënë se ky koalicion është përkrahur ndërkombëtarisht për shkak të dialogut me Serbinë, vetëm për të mos pasur fërkime dhe probleme përderisa të përfundojnë disa tema të rëndësishme për stabilitetin regjional. Ndryshe As PDK-ja dhe as LDK-ja nuk e duan këtë koalicion që shpeshherë duket i padurueshëm për shkak të raporteve kundërthënëse në mes vete, por po mbijeton përderisa ka tema akoma të patrajtuara dhe të papërfunduara të karakterit ndërkombëtar për Kosovën. Është e pritshme që fundi i këtij koalicioni të vijë edhe para kohe", tha Burjani. Edhe sipas analistit Islam Krasniqi, fillimi i prishjes së koalicioneve nëpër nivele lokale tregon fytyrën e vërtetë të koalicionit, i cili edhe pse i brishtë po vazhdon të qëndrojë në këmbë të sëmura. "LDK-ja çdo ditë e më shumë është duke u përçarë mes vete dhe tani askush më mirë se PDK-ja nuk di t'i shfrytëzojë këto situata. Pasojat që do të vijnë nga prishja e koalicionit do të jenë të mëdha, sepse priten dy marrëveshje që të ratifikohen në Parlamentin e Kosovës që BE-ja i ka vënë kusht për liberalizimin e vizave dhe mosratifikimi i këtyre marrëveshjeve që janë shumë të dëmshme për Kosovën do t'i mbajë të izoluar ende qytetarët e Kosovës dhe pasojat do t'i ndjejë vetëm populli, sepse ata kanë mbetur të izoluar, kështu që pakënaqësia në këto subjekte politike për zgjedhjet e reja vetëm sa do të rritet akoma më shumë", tha analisti Krasniqi

(Kosova Sot)