13 studentë malishevas të helmuar në Gjakovë

Në mesin e studentëve të helmuar, në konviktin e studentëve “Sadik Stavileci” në Gjakovë, janë edhe 13 studentë nga Komuna e Malishevës, ndërsa disa prej tyre janë në gjendje jo të mirë shëndetësore.

Sipas drejtorit komunal për shëndetësi, Hajdin Berisha, gjendja e studentëve malishevas, është jo e mirë.

Për këtë qëllim, drejtori Berisha, deri në orët e vona të natës së mbrëmshme, ka qëndruar në spitalin “Isa Grezda” në Gjakovë.

Sipas tij, mbrëmë në këtë spital kanë qenë të shtrirë shtatë studentë nga Komuna e Malishevës, ndërsa gjendja shëndetësore e tyre, është jo e mirë dhe kanë shumë probleme pas helmimit.

“Deri sot në mëngjes, shtatë studentë malishevas janë të shtrirë në klinikën infektive të spitalit në Gjakovë, ndërsa tre student të tjerë, gjatë natës së mbrëmshme, në vazhdimësi janë trajtuar në Qendrën Kryesore të Mjekësisë Familjarë në Malishevë, dhe gjendja e tyre është jo e mirë”, ka konfirmuar për Zyrën për Informim, drejtori i Drejtorisë për Shëndeti në Komunën e Malishevës, Hajdin Berisha.

Berisha ka thënë ”se me shqetësim janë duke e përcjellë këtë situatë të krijuar dhe janë në përcjellje të gjendjes së tyre shëndetësore, e cila aktualisht është shqetësuese”.

(Kosova Sot)