KGJK-ja iu nënshtrua politikës

  • 24 August 2016 - 07:47
KGJK-ja iu nënshtrua politikës

Sistemi i drejtësisë, i ndikuar nga disa politikanë.

"Këshilli Gjyqësor i Kosovës ka rënë nën ndikimin e tërësishëm të politikës, ku roli i tij në mënyrën e përzgjedhjes së gjyqtarëve, natyrisht se në tërësi ka shkuar nëpërmes përzgjedhjeve, të cilat i ka bërë politika, ku brenda saj pastaj është përcaktuar nga KGJK-ja që ka qenë vendimtare në përcaktimin e gjyqtarëve dhe prokurorëve", theksoi analisti Muhamet Kelmendi,raporton Gazeta Kosova Sot

F akti se Gjyqësori kosovar në vazhdimësi ka qenë dhe vazhdon të jetë në qendër të akuzave nga qytetarët e Kosovës, por edhe nga bashkësia ndërkombëtare, flet se KGJK-ja nuk e ka kryer punën e vet si duhet dhe në mënyrë efikase. Ndaj edhe performanca e KGJK-së deri më tani lë shumë për të dëshiruar, e veç- mas pavarësia e Gjyqësorit. Por, në këtë drejtim është shtruar edhe pyetja se çfarë ka bërë KGJK-ja deri më tash dhe cili ka qenë kontributi i tij për të pasur një drejtësi më të mirë se sa që është aktualisht kjo të themi 'padrejtësi' e trafikuar tani e 16 vjet, dhe e instaluar përmes korrupsionit dhe nga politika e inkriminuar. Njohësi i së drejtës dhe të gjitha proceseve të deritanishme politike në vend prof. Muhamet Kelmendi, në një prononcim për gazetën "Kosova Sot", ka thënë se në këtë drejtim ka dështuar politika dhe Kuvendi i Kosovës mu për faktin se e ka politizuar skajshmërish Gjyqësorin e Kosovës, duke e futur atë nën kontroll nëpërmjet njerëzve të dedikuar nga ana e tyre atje, dhe nëpërmjet KGJK-së më pastaj është arritur që të futen nën kontroll edhe Gjykata Themelore, ajo e Apelit dhe Supremja, derisa në këtë kontest, sipas tij, mund të flitet edhe për dualizmin gjyqësor, i cili po krijohet në Kosovën veriore në bazë të marrëveshjes së Mustafës dhe Vuçiqit për krijimin edhe të një pjese të Gjykatës së Apelit në atë pjesë. " Në këtë kontekst, KGJK-ja ka rënë nën ndikimin e tërësishëm të politikës, ku roli i tij pastaj në mënyrën e përzgjedhjes së gjyqtarëve, natyrisht se në tërësi ka shkuar nëpërmes përzgjedhjeve, të cilat i ka bërë politika, ku brenda saj pastaj është përcaktuar nga KGJK-ja, që ka qenë vendimtare në përcaktimin e gjyqtarëve dhe prokurorëve", theksoi ai. 

Ndryshimet politike kushtëzojnë reformën e gjyqësorit Sipas Kelmendit, shihet se edhe anë- tarët e KGJK-së janë përcaktuar nga ana e 'Pronto-ve' të ndryshme të partisë në pushtet dhe anëtarët e gjykatave, e të bordeve etj., gjë që lë të kuptojë se pa u bërë spastrimi i politikës së listave në kuadër të fushës politike nuk mund të spastrosh sistemin gjyqësor, prokurorial dhe atë të policisë dhe në këtë drejtim natyrisht edhe të KGJK-së, i cili vetëm do të jetë dorë e zgjatur e politikës e asgjë më shumë, e aq më tepër kur dihet se këta gjyqtarë përfundimisht pa nënshkrimin e presidentit nuk mund të vendoset në atë pozitë. "Kjo lë të nënkuptojë se e kemi të bëjmë krejtësisht me sistem të politizuar dhe si rrjedhojë drejtësia është larg që të realizohet sipas ligjeve të cilat janë në fuqi", është shprehur Kelmendi. Avokati Tomë Gashi thotë se KGJK-ja ka qenë dhe është pjesë e sistemit juridik të Kosovës, derisa, sipas tij, ashtu siç ka funksionuar i gjithë sistemi juridik, njësoj ka funksionuar edhe KGJK-ja, mirëpo, siç tha, " me ndërrimin e eprorit apo shefit të KGJK-së presim që të ketë ndryshime pozitive në sistemin juridik, duke i pasur ato propozimet ligjore që ai i ka"

Struktura e re të nxjerrë mësim nga e vjetra Analisti politik dhe juridik, Mazllum Baraliu ka vlerësuar se struktura e KGJK-së me kryesuesin e ri, do të duhej të ketë një qëndrim rigoroz në relacion me shkeljet disiplinore, pasi, sipas tij, me dhjetëra gjyqtarë janë në Këshillin disiplinor me muaj dhe vite, derisa në fakt nuk procedohen apo nuk përfundohen lëndët ndaj tyre, teksa në këtë aspekt, Baraliu ka thënë se do duhej që të shtohej përgjegjësia dhe të ashpërsoheshin kriteret. Sipas tij, deri më tash struktura e mëhershme e KGJK-së nuk ka qenë as efikase, por më tepër edhe e ndikuar nga politika, derisa në këtë drejtim do të duhej që struktura e re të mos jetë e ndikuar nga politika, por të jetë sa efikase në punën e saj në mënyrë që vërtet të ndryshojë perceptimi i bashkësisë ndërkombëtare në Raportet e Progresit për Gjyqësorin, por edhe ngritja e imazhit të tij karshi qytetarëve, që ata të kenë besim më tepër si në gjykata ashtu edhe në prokurori", ka potencuar, Baraliu. 

Opozita nuk i zë besë Këshillit Deputeti nga 'Nisma' për Kosovën, Zafir Berisha tha për gazetën "Kosova Sot" se anëtarët e KGJK-së vijnë si rezultat i mbështetjes partiake që jua japin partitë e caktuara dhe, sipas tij, për vetë faktin se ka pasur debate edhe në Parlament për disa nga këta anëtarë, e veçanërisht prej PDK-së dhe LDK-së tregon, siç tha, se edhe të emëruarit në KGJK janë njerëz me mbështetje partiake dhe me llogaridhënie ndaj atyre që i mbështesin. "Kjo e bën të paqëndrueshëm dhe të pabesueshëm këtë Këshill dhe mbase në këtë drejtim duhet edhe urgjentisht të ndërhyhet që të mund t'i hapet rrugë dalëngadalë edhe poreve të tjera të drejtësisë që të vijnë në vendin e vet", ka theksuar Berisha. Kryesuesi i KGJK-së, Nehat Idrizi, në një prononcim të mëhershëm për gazetën "Kosova Sot", kishte thënë se është përcaktuar që përpjekjet e tij tani, por edhe në të ardhmen, do të fokusohen në arritjen e rezultateve sa më të larta në punë, duke respektuar kështu në rend të parë ligjin dhe çdo të drejtë tjetër të përcaktuar me norma ligjore. " Mbetem optimist që së bashku me kolegët e mi, pastaj stafin mbështetës të KGJKsë, por edhe me të gjithë aktoret e tjerë vendorë dhe ndërkombëtarë, që shprehin gatishmërinë e tyre për të na ndihmuar në ketë rrugëtim, do të kontribuojmë në ngritjen e performancës së gjyqtarit, në mënyre që të rritet besimi i publikut në Gjyqësorin e Kosovës", kishte theksuar Idrizi, teksa ishte zotuar se do t'i mbajë në përgjegjësi gjyqtarët, të cilët nuk do të jenë në nivel të kënaqshëm të kryerjes së detyrave dhe obligimeve të përcaktuara me ligj.

(Kosova Sot)