Agonia e një vajze të paralizuar nga një sëmundje e rrallë

Së fundmi është bërë e ditur se, këtë vit, ka pasur rritje të numrit të personave të diagnostikuar me këtë sëmundje. Në rritje janë sidomos rastet me mielit akut të dobët (Acute Flaccid Myelitis – AFM), një nënlloj i sëmundjes, i cili fillon si ethe dhe mund të përfundojë me paralizë,transmeton Gazeta Kosova Sot.

Gabrielle deFiebre gjendej në një qendër tregtare për të blerë çizme të bjeshkatarisë me gjyshen në vitin 2009, kur papritmas ndjeu një dhembje që i zbriste nga qafa deri te duart. Studente aktive e vitit të fundit në “New College” të Floridës, ajo u habit nga kjo dhembje, por nuk i dha rëndësi të madhe. Ajo vazhdoi që të ecte, duke u munduar që t’i relaksonte muskujt herë pas here. Por, gjërat vetëm sa vinin duke u keqësuar. Përfundimisht, duke qëndruar e shtrirë në shtëpi, ajo vendosi se ishte koha për ta marrë një mendim profesional. Kjo ishte koha kur trupi i saj filloi t’i manifestonte shenjat e para të një sëmundjeje paralizuese, të ngjashme me poliomielitin, të quajtur mieliti transvers

Së fundmi është bërë e ditur se, këtë vit, ka pasur rritje të numrit të personave, të diagnostikuar me këtë sëmundje. Në rritje janë sidomos rastet me mielit akut të dobët (Acute Flaccid Myelitis – AFM), një nënlloj i sëmundjes, i cili fillon si ethe dhe mund të përfundojë me paralizë.

 Rrëfimi vetëdijesues

Gabrielle, e cila tani është afër të 30-tave, është njëra nga 100 pacientë që ndan rrëfimin rreth përvojës së saj me këtë sëmundje me anë të uebsajtit të Asociacionit të mielitit transvers, duke tentuar që të hedhë dritë në atë se si ndikon kjo sëmundje te jeta e atyre që i prek.

“Kur isha fëmijë, merresha me gjimnastikë dhe isha me të vërtetë aktive”, thotë ajo në një video të këtij sajti.

“Tani më mungon kjo, më mungojnë kërcimet në trampolinë, më mungon vrapimi. Jeta ime me këtë sëmundje u ndryshua tërësisht. Nuk mund të ngrihem nga karrigia dhe të ecë, të dal në mal”.

Në një postim të saj, ajo përshkruan orët e para kur sëmundja ia kaploi trupin. 

“E vendosa dorën time të djathtë mbi tastierën e kompjuterit dhe pash se nuk mund t’i lëvizja gishtat. I mora gjësendet e mia dhe dola nga banesa e gjyshes, duke hipur në ashensor. Duke e pritur liftin sa s’u alivanosa dhe këmbët e mia vazhduan që të dobësoheshin derisa ecja nga lifti për në veturë. Gjyshja erdhi me mua dhe më dërgoi në emergjencë”.

Ajo nuk mund të ndiente asgjë nën bel dhe nuk mund t’i lëvizte muskujt triceps e as gishtat e asnjërës dorë. Analizat treguan se boshti i saj kurrizor ishte me inflamacion. Doktorët provuan gjithçka. Ata i caktuan asaj një terapi me steroide dhe i bënë plazmaferezë, një terapi e cila ndan plazmën e gjakut nga qelizat, për t’i hequr antitrupat, por më kot.

Kjo teknikë përdoret për të trajtuar sëmundjet autoimune, por është e paefektshme te mieliti transvers.

Gjatë dy javëve të ardhshme Gabrielle pati nevojë edhe për oksigjen.

Ajo vazhdon që të mbetet në karrocë invalidore

Që nga ajo kohë, ajo ka pasur ca përmirësime, duke kthyer kontrollin ndaj muskujve triceps, ndaj gishtave të dorës së majtë dhe trupit. Por, ajo vazhdon që të mbetet në karrocë invalidore.

“Ndonjëherë është vështirë të shpresosh”, thotë Gabrielle në një video.

“Mieliti transvers është sëmundje e pashërueshme, mund ta prekë këdo, kurdo. Por, unë ende kam shpresë. Shpresoj se do ta gjejmë një mënyrë për t’i larguar dëmtimet e shkaktuara nga kjo sëmundje në boshtin kurrizor, në mënyrë që të mund të ngrihem nga karroca dhe të ec”.

Mjekët ende nuk dinë saktësisht se çka e shkakton këtë sëmundje dhe si mund të shërohet ajo. 

(Kosova Sot)