Vetëm heronjtë e drejtësisë e shpëtojnë Kosovën nga kaosi

  • 26 September 2016 - 07:46
Vetëm heronjtë e drejtësisë e shpëtojnë Kosovën nga kaosi

VENDI KA NEVOJË PËR PROKURORË E GJYQTARË TË GUXIMSHËM E TË AFTË

"Ne nuk kemi asnjë gjykatës edhe as prokuror, i cili është vrarë nga krimi i organizuar, që kjo flet edhe për atë se nuk i kanë shpallur luftë krimit, dhe kësisoj përderisa nuk i kanë shpallur një luftë të tillë krimit, ky i fundit nuk i ka ngacmuar ata. Por, në këtë aspekt së pari duhet të krijohet ideja në medie që na duhen heronj në mesin e prokurorëve dhe gjyqtarëve", shprehet analisti Nexhmedin Spahiu

Lekaj: Duhet një gjeneratë e re që të vijë në krye të drejtësisë

Analistët dhe njohësit e fushës së drejtësisë, por edhe opozita e vendit kanë sugjeruar se për ta ndryshuar këtë gjendje të brishtë në drejtësi, kërkohet një gjeneratë e re e cila do të vinte në krye të drejtësisë dhe do ishte pa etiketime, por njëkohësisht të bëhej edhe një reformë e thellë dhe mirëfilltë në këtë sistem. Krahas kësaj, ata kanë thënë se duhet të ngrihet edhe ideja e heroizmit në mesin e gjyqtarëve dhe prokurorëve, ngase në të kundërtën nuk mund të ngrihet në këmbë as institucioni i drejtësisë. Shtrohet pyetje a ka shpresë dhe mundësi reale Kosova që të krijojë një brez të ri nga dhe nga e para të prokurorëve e gjyqtarëve të painkriminuar, të shkolluar dhe të aftë e me etikë dhe integritet profesional, të cilët do të zëvendësonin të gjithë të korruptuarit e të inkriminuarit ekzistues në sistemin e drejtë- sisë, dhe po ashtu a mund të gjinden së paku 'disa heronj të drejtësisë' në këtë vend për t'ia kthyer shpresën dhe besimin qytetarëve në 'drejtësinë e ardhshme kosovare'? Analisti Shefqet Dibrani në një prononcim për gazetën "Kosova Sot" ka thënë se Kosova ka mundësi reale për të dalë nga kriza e thellë, e cila e ka kapluar jo vetëm në rrafshin e drejtësisë, por në të gjitha drejtimet, por mbetet enigmë dhe pikëpyetje nëse e ka një vullnet të tillë për të dalë nga kriza, shkruan gazeta Kosova Sot.

Mbi drejtësinë është krijuar një mjegullnajë

Sipas Dibranit, oligarkët janë në gjendja ta shtyjnë vendin drejt anarkisë, drejt kaosit dhe drejt luftës civile, ngase, siç tha, ata kështu mendojnë se do t'i shmangen gjykimit të pjesërishëm ose të tërësishëm. "Shpresat janë më të vogla, prandaj mundësitë nuk duken në horizont, pasi fillimisht duhet vullnet dhe vendosmëri, për t'ia shtuar shpresat këtij populli se Kosova nuk ka përfunduar. Jo vetëm nga brezi i ri, por Kosova ka një garniturë prokurorësh dhe gjyqtarësh, të cilët nuk janë të involvuar deri në atë shkallë sa të mos e kenë të drejtën morale për ta ushtruar detyrën e tyre profesionale. Por, mbi drejtësinë është krijuar një mjegullnajë, ndërsa kualifikimet e përgjithshme e pengojnë vullnetin e mirë për të lëvizur në këtë plan. Gjithsesi e tashmja kaq e rënduar dhe ardhmëria e drejtësisë në Kosovë duhet të shikohet nga një brez i ri, i cili nuk i ka hipotekat e sistemit të kaluar dhe as nuk janë të shantazhuar nga e tashmja mbytëse dhe pa perspektivë", ka vijuar më tej ai, derisa ka thënë se nuk e di se sa janë të interesuar vendet mike për të bërë reforma, për të dhënë instruksione dhe për ta përgatitur një brez tjetër që do ta kthente drejtësinë në binarë dhe do të jepte shpresën se këtu do të bëhet mirë. "E nëse sot fillohet me reforma, rezultati i kësaj përpjekjeje do të shihet pas dy vitesh e nëse ne nuk fillojmë diku sot, të mos presim as pas katër vitesh se do të bëhet mirë. Prandaj shtresa intelektuale, njerëzit e ndërgjegjshëm nuk duhet të presin se mrekullia vjen nga Zoti dhe nga Amerika". Ndërsa sa u përket heronjve të drejtësisë, Dibrani thotë se ata janë në mesin tonë, por vetëm se ata duhet inkurajuar për t'u flijuar për të marrë përgjegjësinë për një proces i cili duhet të ndodhë. "Ne kemi dy-tre raste të heronjve, por ata ose u mbyten nga injoranca ose u injoruan, por intelektuali kurrë nuk duhet të dorëzohet, nga hipokrizia dhe hipokritët që e rrethojnë atë dhe shoqërinë. Dikush duhet ta marrë primatin e heroit të drejtësisë në Kosovë", është shprehur Dibrani.

Burjani: Kosova ka gjyqtarë e prokurorë të dobët

Eksperti i fushës së sundimit të Ligjit, Blerim Burjani, mendon se gjasat janë që të përmirësohet kjo gjendje e brishtë në drejtësi, por gjithnjë, sipas tij, nëse ka gatishmëri dhe seriozitet në temën e reformës, derisa siç tha ndihma me e madhe për gjyqësorin dhe prokurorinë, do të ishte të fillohet një reformë gjithëpërfshirëse në kuptimin profesional dhe teknik. "Por, ka pas dështime të mëdha në këtë sistem gjatë procesit të rekrutimit, pasi ka gjyqtarë e prokurorë tani, dhe që fatkeqësisht është një numër jashtëzakonisht i madh i tyre që notën mesatare të studimeve të rregullta e kanë gjashtë. Ndërsa provimi apo edukimi i dobët për gjyqtarë dhe prokurorë që përmes një provimi të thjeshtë të jurisprudencës, që ka mbetur prej kohës së komunizmit, ka bërë që sot Kosova të ketë gjyqtarë e prokurorë të dobët dhe me probleme nga fillet e së drejtës, andaj kjo është edhe për të të ardhur keq, por natyrisht se duhet të punohet në drejtim të bërjes së një drejtësie të paanshme dhe joshantazhuese e të papolitizuar dhe krahas kësaj edhe një reforme të kuadrove dhe përgatitjeve të gjeneratave të reja", ka theksuar Burjani për gazetën "Kosova Sot". Analisti Nexhmedin Spahiu thotë se në medie duhet të ngrihet ideja e heroizmit në mesin e gjyqtarëve dhe prokurorëve, derisa siç tha, ne akoma nuk kemi ndonjë të tillë prej tyre që ka humbur jetën nga krimi i organizuar, teksa, sipas tij, në të gjitha vendet evropiane ka njerëz, të cilët janë viktima të krimit të organizuar, andaj edhe në ato vende është ngritur institucioni i drejtësisë, pasi një gjë e tillë nuk mund të bëhet pa pasur heronj e vet. "Ne nuk kemi asnjë gjykatës edhe as prokuror, i cili është vrarë nga krimi i organizuar, që kjo flet edhe për atë se nuk i kanë shpallur luftë krimit, dhe kësisoj përderisa nuk i kanë shpallur një luftë të tillë krimit, ky i fundit nuk i ka ngacmuara ata. Por, në këtë aspekt së pari duhet të krijohet ideja në medie që na duhen heronj në mesin e prokurorëve dhe gjyqtarëve, por veç kësaj kërkohet që edhe puna e tyre të bëhet sa më shumë publike, në mënyrë që të dihet se cili gjykatës po gjykon drejt, e cili është i dobët, po ashtu cili prokuror ka guximin të merret me çështje të guximshme, e cili prokuror po dështon ta bëjë këtë. Sa më shumë të bëhet kjo, atëherë rrjedhimisht edhe lind ideja e heroizmit dhe atëherë mund të krijojmë shtyllën e drejtësisë dhe shtet në Kosovë. Sepse, nëse shtylla e drejtë- sisë nuk funksionon, atëherë nuk mund të themi se kemi edhe shtet", ka potencuar Spahiu për gazetën "Kosova Sot". Shefi i Grupit parlamentar të AAK-së, Pal Lekaj, sa i përket shpresës se nëse Kosova do të krijojë një brez të ri të prokurorëve e gjyqtarëve të painkriminuar, të shkolluar e të aftë, mendon se do të ekzistonte nëse do të ishte së pari vullneti, por edhe të bëhej monitorimi në mënyrën më të mirë të mundshme i sistemit të drejtësisë, që ai të jetë sa më efikas, dhe rrjedhimisht të vinte edhe një gjeneratë, e cila do të ishte pa etiketime dhe e drejtë, që vërtet siç tha të ndikonte në një zhvillim të mirëfilltë të drejtësisë në Kosovë. 

(Kosova Sot)