Bakteret fatale, vëlla e motër nuk guxojnë të luajnë bashkë!

Motra e vëllai duhet secili të marrin nga 45 tableta në ditë, me qëllim të pastrimit të mushkërive të tyre. Dëmtimet e shpeshta dhe të shumta, të shkaktuara nga mikrobet, mund të çojnë deri te dështimi i mushkërive, gjë që mund të jetë fatale,transmeton gazeta Kosova Sot.

 
 Këta, vëlla e motër, do të preferonin shumë që të luanin së bashku, por nëna e tyre është e detyruar t’i mbajë ndaras, për shkak se bakteret e tyre mund të jenë fatale për njëri-tjetrin.

Faye 4 dhe Alfie 3 vjeç, nga Maldon, Eseks, ishin diagnostikuar me fibrozë cistike pak kohë pas lindjes, e cila është një sëmundje e rëndë e mushkërive, që shkakton mbledhjen e sekrecionit në mushkëri.

Kjo ndikon në shumimin e baktereve, të cilat shpesh shkaktojnë infeksione të shpeshta të mushkërive. Kjo d.m.th. se motra e vëllai duhet secili të marrin nga 45 tableta në ditë, me qëllim të pastrimit të mushkërive të tyre. Dëmtimet e shpeshta dhe të shumta të shkaktuara nga mikrobet mund të çojnë deri te dështimi i mushkërive, gjë që mund të jetë fatale.

Fëmijët nuk guxojnë as të flenë në dhomë të njëjtë

Kjo bën që e ëma e tyre, 23-vjeçare, Zoe Fuhr, të mos ketë çare pa i mbajtur ata ndaras, nga frika se mund t’i shkaktojnë njëri-tjetrit ndonjë infeksion të rrezikshëm. Ata luajnë në dhoma të ndryshme dhe nuk lejohen që ta përqafojnë njëri-tjetrin. Por, familjarët thonë se ndarja e tyre mund të jetë shumë e vështirë ndonjëherë. Fëmijët nuk guxojnë as të flenë në dhomë të njëjtë.

“Ata janë fëmijë shumë aktivë dhe të gëzuar, por kanë një sëmundje të mushkërive, e cila di t’ua nxijë jetën”, thotë e ëma e tyre.

Kur zonja Fuhr ngeli shtatzënë me partnerin e saj. Lee Clowser, 26 vjeç, ata nuk e kishin idenë se bartnin gjenin e fibrozës cistike. Dhe, kur në vitin 2011 lindi Faye, ata kishin menduar se vogëlushja ishte shëndosh e mirë. Por, brenda pak javësh, ata vërejtën se vajza kishte vështirësi që të ushqehej dhe të merrte frymë. Analizat mjekësore treguan se ajo vuante nga fibroza cistike, një sëmundje gjenetike, e cila bën mushkëritë që të mbushen me sekrecion.

“Ata do të kalonin bashkë vështirësitë e kësaj sëmundjeje”

Zonja Fuhr thotë: 'Askush në familjen time nuk vuan nga kjo sëmundje, prandaj mbeta e tronditur kur vajza ime u diagnostikua me të. Këtë gjen nuk e ka as motra ime, e as vëllai i burrit tim. Ishte me të vërtetë fat i keq që, si unë, po ashtu edhe burri im, të jemi bartës të këtij gjeni, gjë që nuk e kishim ditur fare”.

Çifti donin ta kishin edhe një fëmijë, por kishin frikë se edhe ai do të vuante nga sëmundja të cilën e bartnin. Më pas, pasi që mjekët iu thanë se ky rrezik ishte 1 në 4, ata vendosën që të rrezikonin. Por, për fat të keq, ata përsëri dolën të ishin fatkeq, pasi që edhe djali i tyre, Alfie, u diagnostikua me fibrozë cistike kur kishte vetëm gjashtë javë.

“Momenti kur morëm vesh se të dy fëmijët tanë vuanin nga fibroza cistike, ishte moment shumë i vështirë”, thotë e ëma e tyre.“Disi ndiheshim fajtorë për këtë”, shton ajo.

Por, sipas saj, këtu kishte edhe pak ngushëllim, meqë që të dy ata do të kalonin bashkë vështirësitë e kësaj sëmundjeje.

Çka është fibroza cistike?

Fibroza cistike është një sëmundje, e cila i bën mushkëritë dhe sistemin e organeve të tretjes që të mbushen me sekrecion. Simptomat rëndom fillojnë në fëmijëri të hershme dhe përfshijnë një kollitje të përhershme, me infeksione të shpeshta të gjoksit dhe me dështim të shtimit në peshë. Më vonë mund të nevojitet transplantimi i mushkërive. Nuk ka ilaç për fibrozë cistike, kështu që i tërë trajtimi është simptomatik, pra ka për qëllim lehtësimin e simptomave dhe përdorimin e antibiotikëve, për të parandaluar infeksionet me baktere. Kjo sëmundje shkaktohet nga një mutacion gjenetik, i cili lejon një sasi të tepër të kripës dhe ujit brenda qelizave, gjë që rezulton me grumbullimin e sekrecionit. Që një fëmijë ta trashëgojë këtë sëmundje, duhet që të dy prindërit të jenë bartës të gjenit që ka pësuar mutacion.

Rreth 1 në 2,500 bebe të lindura në Britani të Madhe lindin me fibrozë cistike. Meqë kohët e fundit është përmirësuar trajtimi, perspektiva e këtyre fëmijëve është përmirësuar dukshëm. Personat e prekur nga kjo sëmundje pritet që të jetojnë deri në të dyzetat e tyre.

(Kosova Sot)