Trevjeçari me këmbë gjigante nuk mund të ecë

  • 24 October 2016 - 20:03
Trevjeçari me këmbë gjigante nuk mund të ecë

PËR SHKAK TË NJË ÇRREGULLIMI TË RRALLË

Fëmija beson që këmba e tij e madhe është një dhuratë dhe se ai është fatlum që e ka një këmbë të tillë

Akshaj Khandelwal vuan nga Sindroma 'Klippel-Trenaunay' - që prek një në 100,000 njerëz dhe ia pamundëson atij ecjen normale
Një djalosh trevjeçar vuan nga një çrregullim i rrallë gjenetik që ka bërë që këmba e tij të ënjtet dhe të bëhet katër herë më e madhe sesa një këmbë normale e një trevjeçari. Akshaj Khandelwal vuan nga Sindroma 'Klippel-Trenaunay' - që prek një në 100,000 njerëz dhe ia pamundëson atij ecjen normale. Çrregullimi gjithashtu bën që këmba e tij të gjakosë në rast se ai mundohet të ecë më shumë se disa hapa dhe e privon nga shkuarja në shkollë vetëm. Meqë nuk është në dijeni që vuan nga një çrregullim, fëmija beson që këmba e tij e madhe është një dhuratë dhe se ai është fatlum që e ka një këmbë të tillë, transmeton gazeta Kosova Sot.

Ai beson që këmba e madhe e bën 'superman'

Njerëzit shpeshherë mundohen ta mbajnë distancën nga ai, meqë kanë frikë se mund të infektohen, duke bërë që familja e tij të druhet që në të ardhmen ai të ngacmohet nga fëmijët tjerë. Babai i tij i shqetësuar, Ankur, nga India, beson që ai është ende i vogël për t'ia thënë të vërtetën, meqë sëmundja e tij nuk ka shërim. Zotëri Khandelwal ka thënë: "Im bir nuk e di se është i sëmurë. Nuk duam që ai të ndihet keq. Ai beson që këmba e madhe e bën 'superman'. Ai është shumë i vogël për t'i ditur problemet që ka. Ai nuk mund të shkojë në shkollë vetëm dhe është mjaft sfiduese për ne që ta dërgojmë në shkollë. Jemi munduar që ta mësojmë se si të sillet me të tjerët, në rast se ballafaqohet me ngacmime nga shokët e klasës. Megjithatë, frikësohem që kjo gjë nuk do të funksionojë përgjithmonë. Sot ai është i dëgjueshëm dhe e kupton që nuk duhet të zihet me të tjerët, në rast se ngacmohet, mirëpo nesër mund të mos më dëgjojë. Ky është shqetësimi im më i madh". Prindërit e tij i kanë vizituar pothuajse të gjithë spitalet në Nju-Delhi megjithatë janë kthyer pa ndihmë. 

Gjasat, të vogla për shërim

Doktorët në Spitalin "Fortis" vazhdojnë të jenë të habitur nga çrregullimi dhe thonë që gjasat që ai të trajtohet me sukses janë shumë të vogla. KTS është një çrregullim i rrallë gjenetik që prekë zhvillimin e enëve të gjakut, indeve të buta dhe eshtrave. Sëmundja ka tri efekte anësore kryesore: mavijosjet e mëdha, rritja e tepërt e eshtrave - veçanërisht e atyre të gjymtyrëve - dhe zgjerimi i venave. Dr. Krishan Chugh, drejtor i repartit të pediatrisë, ka thënë: "KTS është një formë e sëmundjes që bën që venat të mos formohen si duhet. Është një çrregullim që kryesisht prekë fëmijët. Akshaj ka tendencë që të gjakosë nga zorrët dhe testet kanë treguar që furnizimi i zorrëve me gjak nuk është normal". Në anën tjetër, nëna e tij, Shruti, ka thënë që doktorët u kanë treguar që për momentin nuk ka shërim për çrregullimin, gjë që ia ka thyer zemrën asaj.

(Kosova Sot) 

 Image result for Akshaj Khandelwal Syndrom Klippel-Trenaunay