Gjermani, aty ku sirianët i konsiderojnë xhamitë “tepër konservatore”

  • 28 October 2016 - 21:38
Gjermani, aty ku sirianët i konsiderojnë xhamitë “tepër konservatore”

Hani Salam u arratis nga lufta civile në Siri dhe i mbijetoi një udhëtimi të rrezikshëm nga Egjipti në Europë. Por, kur pa persona me mjekra të gjata në një xhami pranë shtëpisë së tij të re në Këln të Gjermanisë, nëntorin e kaluar, ai nisi të shqetësohej.

Shfaqja e tyre i kujtoi atij rebelët islamikë të “Jaish al-Islam”, të cilët morën nën kontroll vendlindjen e tij pranë Damaskut, – thotë 36-vjeçari Salam, – të cilët ishin me mustaqe, por jo mjekra. Njëri prej tyre i tha Salamit se “myslimanët e mirë rrisin mjekrën, jo mustaqet”.

“Gjithçka rreth asaj xhamie më bëri të ndihesha jo i qetë”, tha ai.

Sirianët në Gjermani thonë se shumica e xhamive arabe në këtë vend janë më shumë konservatore sesa ato në vendlindjen e tyre. Përgjatë dy muajve, një dyzinë sirianësh nga 6 vende të shenjta lutjeje në 3 qytete, u  shprehën për “Reuters” se ishin të parehatshëm me mesazhet konservatore që jepeshin në xhamitë arabfolëse.

Njerëzit kanë kritikuar mënyrën sesi të sapoardhurit visheshin dhe praktikonin besimin e tyre, tha ai. Disa këmbëngulën se Kurani duhet interpretuar fjalë për fjalë. Kjo është një çështje e shumëdiskutuar në një vend ku, fluksi i jashtëzakonshëm i emigrantëve drejt Europës po sjell pasoja të thella politike dhe sociale.

Në Gjermani, gjatë këtij viti, “Alternativa për Gjermaninë”, një parti populiste që thotë se Islami nuk është i përputhshëm me Kushtetutën gjermane, po fiton terren. Atje ka pasur një sërë sulmes nga militantët myslimanë. Sirianët dhe të tjerë thonë se problemi i xhamive i shtohet mosbesimit.

Në Gjermani, besimet e tjera janë tradicionalisht të mbështetura nga shteti. Por shumica e 4 milionë myslimanëve në vend, kryesisht vijnë nga Turqia dhe frekuentojnë xhamitë turqishtfolëse, të cilat janë pjesërisht të financuara nga Ankaraja.

Vitin e kaluar, rreth 890 mijë azilkërkues, më shumë se 70 për qind e të cilëve myslimanë, mësynë Gjermaninë. Rreth një e treta e tyre vinin nga Siria. Shumica e tyre nuk donin të shkonin në xhamitë turke, sepse nuk i kuptojnë predikimet e tyre. Ata preferojnë të luten në vendet ku flitet arabisht.

Megjithatë në këto xhami kanë dalë edhe probleme të tjera. Më së shumti atyre u mungojnë fondet, ndërsa të tjera janë të mbështetura nga Arabia Saudite apo vendet e tjera të Gjirit Persik. Disa mbështesin ultrakonservatorët, apo ata që bëjnë interpretime shumë të mirëfillta të Islamit, siç janë Vehabizmi apo Salafizmi.

“Fatkeqësisht është e vërtetë se shumica e xhamive arabishtfolëse janë më konservatore sesa xhamitë turke”, thotë profesori Mouhannad Khorchide, i cili drejton Qendrën për Teologjinë Islamike në Universitetin “Muenster”. Kjo përbën problem për integrimin e atyre që janë më pak konservatorë.

Në Këln, Salam thotë se 75 sirianë jetojnë në të njëjtin hotel, si të ishin një familje e tërë. Prej tyre, vetëm një grua e mbuluar lutet në xhaminë më të afërt ku flitet arabisht. “Një herë kur shkova atje, një salafist i kërkoi një të riu arab të largohej, sepse mbante pantallona të shkurtra”, shtoi ai. “Në fakt, në xhamitë turke askush nuk do t’ia dijë se çfarë mban veshur”.

(Kosova Sot)