Kosovari bëhet hero për një ditë të vetme në Austri, ai shpëtoi një fëmijë nga nëna e tij

  • 11 October 2017 - 13:13
Kosovari bëhet hero për një ditë të vetme në Austri, ai shpëtoi një fëmijë nga nëna e tij

Një nënë e dehur (42) është parë të dielën pasdite në sheshin Braunau të Austrisë teksa keqtrajtonte vajzën e saj dyvjeçare. Shqiptari (21) Elvis Kadriu, i tmerruar nga kjo situatë, ndërhyn për ta shpëtuar vogëlushen nga “kthetrat” e nënës së saj. 

“Skenat që kam parë atë ditë ende më kanë mbetur nëpër kokë. Nuk mundem të besoj se si një nënë mund të sillet në atë mënyrë ndaj fëmijës së saj”, ka thënë Elvisi për gazetën austriake “Heute.at”. Kadriu ka thënë se edhe pas dy ditësh ende është i tronditur nga tmerri.

Siç raportohet, vajza ishte e veshur me një fustan, blusë dhe me këmbë zbathur në një temperaturë të ftohtë, prej 8 gradë. Nëna e dehur keqtrajtonte vajzën Leonie, madje ajo e hodhi për tokë më gjithë forcën që kishte. Vogëlushja vetëm qante.

“Unë isha duke u kthyer me veturë nga shtëpia e hallës sime. Në një kryqëzim pashë se si gruaja e keqtrajtonte fëmijën e saj”, ka shpjeguar rastin Elvisi.
21-vjeçari shqiptar kur sheh atë ngjarje, parkon veturën dhe flet me gruan. Megjithatë, gruaja sillet në mënyrë shumë agresive. “Ajo ishte aq e dehur sa që nuk arrinte të qëndronte as në këmbë”, ka shtuar ai.

Derisa Elvisi ka arritur ta shpëtojë fëmijën nga keqtrajtimet e mëtutjeshme, nuk lejon as gruan të ikë pa ardhur policia.

Për shkak të lëndimeve trupore, Leonia e vogël është dërguar në spital.

Elvis Kadriu ka thënë se dëshiron që sot ta vizitojë vajzën në spital dhe të shohë për së afërmi se si është gjendja e saj shëndetësore.

(Kosova Sot)