I ati bart sëmundjen gjenetike te dy fëmijët e tij
Luke Rollinson, 36 vjeç, e njeh traumën e kancerit të fëmijërisë - ai e kishte përjetuar vetë atë kur kishte 18 muaj Një baba i guximshëm, i cili kishte parë dy fëmijët e tij duke u ballafaquar me kancerin, 30 vjet pasi edhe vetë ishte ballafaquar me atë sëmundje, duke humbur njërin sy, ka vendosur që ta bëjë publik rastin e tij. Luke Rollinson, 36 vjeç nga Nju Sauth Uells (Uellsi i ri jugor), e njeh shumë mirë traumën e kancerit të fëmijërisë - ai e kishte përjetuar vetë atë kur kishte 18 muaj dhe, të dy fëmijët e tij, i biri 4- vjeçar dhe e bija, dy, ishin diagnostikuar me retinoblastomë shkurt pas lindjes. 'Tani shikojmë prapa dhe mendojmë, "Si e tejkaluam këtë gjë?", thotë Luke.
Kishte humbur syrin e djathtë
Luke kishte humbur syrin e djathtë për shkak të retinoblastomës, rreth 30 vjet më parë, por nuk ishte në dijeni se i biri i tij, Eli, do të lindte me mutacionin e njëjtë gjenetik, i cili shkakton paraqitjen e kancerit. Kur Eli kishte vetëm 4 muaj, Luke dhe gruaja e tij, Katie, vërejtën një refleks të bardhë në syrin e tij, gjatë bërjes së fotografive me blic, një shenjë se kanceri mund të jetë i pranishëm prapa retinës së syrit. Mjekët më pas zbuluan një duq të vogël të tumorit dhe shpejt e sulmuan atë me laser dhe krimoterapi, duke bërë që Eli të mos mbetej pa sy, sikur i ati. Retinoblastoma paraqitet kur qelizat anormale në retinë të syrit rriten në mënyrë të pakontrolluar. Ky kancer zakonisht paraqitet te fëmijët e vegjël dhe mund të prekë njërin, apo të dy sytë. Retinoblastoma është më e shpeshtë te fëmijët nën moshën 3 vjeçare edhe pse ajo mund të paraqitet te çdo moshë. Simptomat e kësaj sëmundjeje mund të përfshijnë: një bebëz e syrit e cila duket e bardhë, në vend se e kuqe, kur në të qitet drita (si psh gjatë bërjes së fotografive me blic), skuqja apo dhembja e syrit, turbulli mi i irisit (pjesës së syrit me ngjyrë) dhe bebëzat e syve që duket se shikojnë në drejtime të ndryshme. Por, tmerri i zbulimit të kancerit ishte vetëm fillimi i tmerrit për Luke-n dhe gruan e tij. Kur Katie kishte qenë shtatzënë në vajzën e saj, Harper, çifti ishin të përgatitur për më të keqen dhe bënë testet prenatale (para lindjes), për të parë se a e bartë edhe vajza gjenin shkaktar të retinoblastomës.
Dy fëmijë të diagnostikuar me kancer
Tetë ditë pas lindjes, doktorët gjetën një tumor të madh prapa syrit të saj të djathtë dhe, pas vetëm 12 ditësh pas ardhjes në këtë botë, Harper filloi trajtimin me kimioterapi. "Vajza ime i kaloi pesë muajt e parë të jetës së saj në spital, duke u trajtuar me kimioterapi", thotë Luke, i cili në njërën anë e konsideron veten me fat që ka zbuluar me kohë kancerin e fëmijëve, por në anën tjetër, thotë se nuk është lehtë të kesh dy fëmijë të diagnostikuar me kancer. Fatmirësisht, te të dy fëmijët tumori është zbuluar me kohë, prandaj ata nuk kanë humbur syrin, sikur i ati i tyre. Luke dhe gruaja e tij falënderojnë të gjithë individët dhe organizatat të cilat iu kanë ndihmuar në këtë drejtim. Ai thotë se tani gjenden në një 'vend të mirë' dhe janë në fazën e monitorimit pas zbulimit të hershëm dhe trajtimit të kancerit te fëmijët e tyre. Familja Rollinson vazhdon që shpesh të shkojnë në spital, për vizita kontrolluese të fëmijëve. Luke thotë se është i lumtur që fëmijët e tij thuajse as që do ta mbajnë mend që kishin vuajtur ndonjëherë nga kanceri i syrit, meqë ishin tepër të vegjël.
(Kosova Sot)
