Si dy vjeçar, pasi kërceu nga shtrati, humbi vetëdijen dhe nuk mund të çohej më

  • 24 May 2018 - 19:21
Si dy vjeçar, pasi kërceu nga shtrati, humbi vetëdijen dhe nuk mund të çohej më

7-VJEÇARI DIAGNOSTIKOHET ME NJË SËMUNDJE TË RRALLË TË TRURIT

Kur Sam Buck kishte dy vjet, ai në një rast kishte kërcyer nga shtrati i tij dhe, përkundër faktit që vendi ku ra nuk ishte i fortë, ai e humbi vetëdijen dhe mbeti në atë gjendje për rreth 30 sekonda. Pasi që u zgjua, prindërit e tij, Allyson dhe Nick, tentuan që ta ngrinin në këmbë, por ai u rrëzua. Ata provuan përsëri, por këmbët e tij dukeshin të paafta për ta mbajtur peshën e trupit të tij. 

Mungesa e ilaçeve

Sam kurrë më nuk mundi të ecte. Për gjashtë javë më pas, familja e këtij djali nga Konektikati, që asokohe jetonte në Londër, nuk mori asnjë shpjegim nga mjekët, se çka kishte djali i tyre Sam, që tani ka shtatë vjet. Përfundimisht, pas një skanimi CAT dhe një rezonance magnetike, një neurolog e diagnostikoi atë me sëmundjen e zhdukjes së masës së bardhë të trurit, një çrregullim të rrallë gjenetik të trurit, i cili prekë sistemin nervor qendror. Të prekurit nga kjo sëmundje përjetojnë ngërçe, humbje të aftësive motorike, verbëri dhe, në fund, vdekje, për shkak të mungesës së ilaçit, transmeton "Kosova Sot Online". Kjo diagnozë ishte tronditje për prindërit Allyson dhe Nick, meqë deri atëherë djali i tyre nuk kishte manifestuar asnjë simptomë të kësaj sëmundjeje. 

Ai nuk mund të shkruajë as të lexojë

'Ai ishte paksa i ngathët, por vraponte dhe ecte sikur çdo fëmijë tjetër i moshës së tij', thotë e ëma Allyson. Simptomat e kësaj sëmundjeje rëndom së pari paraqiten pas ndonjë infeksioni, stresi, apo traume të kokës. Mielina, masa e bardhë, e yndyrshme që izolon (mbështjellë) fijet nervore, fillon që të zhduket. Kjo është një sëmundje e rrallë, me vetëm 250 raste të regjistruara në botë dhe, është gjenetike, gjë që d.m.th. se edhe dy fëmijët e tjerë të Allysonit dhe Nickut, kanë një rrezik prej 25% të preken nga kjo sëmundje. Sam tani ka nevojë për karrocë invalidore, flet ngadalë dhe duart shpesh i dridhen. Mund të ngufatet derisa ha, meqë muskujt e tij janë duke e humbur aftësinë e kontrollimit të përtypjes. Ai nuk mund të shkruajë as të lexojë dhe vuan nga çrregullimet e memories afatshkurtër. Prindërit e tij mundohen që t'i krijojnë sa më shumë kujtime të mira, meqë e dinë se ai nuk e ka jetën e gjatë. Ata po ashtu janë duke mbledhur mjete për të financuar kërkimet shkencore për këtë sëmundje. 

(Kosova Sot)