Pa u shpallur rezultatet përfundimtare, Rama e Vuçiq urojnë Erdoganin

Pas suksesit në zgjedhjet e mbajtura sot në Turqi, liderët botëror kanë uruar presidentin e Turqisë, Recep Tayyip Erdogan, transmeton Anadolu Agency (AA).

Kryeministri i Shqipërisë, Edi Rama, përmes linjës telefonike ka uruar presidentin Erdogan për suksesin në zgjedhje, raporton AA. 

Sipas burimeve presidenciale, presidenti Erdogan falënderoi kryeministrin e Shqipërisë për urimin.

Njësoj, sipas kësaj agjencie ka bërë edhe presidenti i Serbisë, Aleksandar Vuçiq.

Kryeministri i Hungarisë, Viktor Orban, u bë lideri i parë i një shteti të Bashkimit Evropian (BE), i cili uroi presidentin Erdo?an për suksesin në zgjedhje. Sipas zyrtarëve, ai uroi presidentin turk përmes linjës telefonike.

Erdoganin e kanë uruar edhe presidenti i Azerbajxhanit, Ilham Aliyev, kryetari i Këshillit Presidencial të Bosnjë dhe Hercegovinës, Bakir Izetbegoviq, presidenti i Palestinës, Mahmud Abbas, emiri i Katarit, Tamim bin Hamad al Thani.

Deri tani nuk raportohet të kenë ardhur urime nga vende tjera.

Ende nuk janë shpallur rezultatet përfundimtare, por bazuar në ato preliminare, Erdogan do të fitojë në zgjedhjet presidenciale në Turqi që në rundin e parë, pa pasur nevojë për balotazh.

 

(Kosova Sot)