Ish-modelja, e paaftë që të hajë (Foto)
Për më pak se dy vjet, Lisa Brown ka humbur rreth 25 kg. Ish-modeles i ka mbetur vetëm hija, e gjymtuar nga dhembja e vazhdueshme, e cila është duke e çuar drejt një vdekjeje të ngadalshme. Çdo ditë ajo ballafaqohet me vjellje të mëdha, me dhembje dhe nauze, e paaftë që të gëlltisë ndonjë ushqim të fortë. Përkundër të tjerëve, të cilët mendojnë se ajo vuan nga anoreksia, ish-modelja 32 vjeçare në fakt vuan nga një sëmundje tepër e rrallë, transmeton Kosova Sot Online.
Vizita në tri spitale të ndryshme
Me një peshë prej vetëm 40 kilesh, ajo tani është njëra nga vetëm 400 njerëzit në botë, që vuajnë nga kjo sëmundje, e cila ka një shkallë të vdekshmërisë një në tre. Sindroma e arteries së epërme mezenterike (SMAS) është një çrregullim gastrovaskular, i cili shkakton shtrëngimin e zorrëve, duke bërë të pamundur kalimin e ushqimit të fortë nëpër zorrë. Kjo, në rastin e Lisa-s, d.m.th se duodenumi i saj (pjesë e zorrës së hollë) gjendet i shtypur midis aortës dhe arteries mezenterike të epërme. Sëmundja e kësaj 32-vjeçareje ishte diagnostikuar pasi që ajo ishte vizituar në tri spitale të ndryshme dhe kishte bërë shumë incizime CT. Për më pak se dy vjet, pesha e saj u zvogëlua për 30%.
“Isha një person i gjallë, e shoqërueshme dhe e shëndoshë, kurse tani kam dhembje të vazhdueshme, varem nga të tjerët dhe, gjatë pjesës më të madhe të kohës, jam e detyruar që të rri në shtëpi”, thotë ajo. Sa i përket dhembjes, ajo e përshkruan atë sikur ndokush t’ia kapte zorrët me dara të metalta, dhe t’ia shtrëngonte ato.
Lisa varet nga nëna
Zakonisht kjo sëmundje diagnostikohet vonë, për shkak të diagnozës së gabueshme. Përkundër shumë operacioneve, Lisa nuk ka arritur që të shërohet. Burri i saj 32-vjeçar Patrick Brown, thotë se sëmundja ua ka ndryshuar tërë jetën. Ai thotë se është i tmerruar rreth të së ardhmes së gruas së tij. Kur burri është në punë, Lisa varet nga nëna e saj.
Të tjerët mendojnë se ajo vetë nuk ha, prandaj shpesh i thonë të hajë diçka, sepse nuk duket mirë. Për këtë shkak, energjitë e fundit që i kanë mbetur, Lisa i shfrytëzon për t’i vetëdijesuar të tjerët rreth kësaj sëmundjeje të rrallë.
(Kosova Sot)