PRETENI: FATKEQËSISHT, NE JEMI LARG SHTETIT TË SË DREJTËS FUNKSIONALE E TË PAVARUR

Një fakt të tillë e pohon edhe eksperti Hasan Preteni. "Nuk kanë frikë as nga Zoti e as nga shteti. Në shtetet normale, në shtetet me demokraci të konsoliduar, kërcënimi më serioz është kur dikujt i thuhet "ju dërgoj në gjyq", derisa tek ne vlen e kundërta, të dërgoj në gjyq, kjo është shakaja më e mirë që bëhet. Është pra hipokrizia më fuqishme e që e dëgjojmë për çdo ditë, kur disa nga politikanët tonë thonë "dërgoni rastet në gjykata nëse dini diçka"! E këtu tani shtrohet pyetja dhe pikëpyetja e madhe... Prandaj po i pyesim ata, po kujt t'i ankohemi kur zgjat procesi deri në 8 vjet, që çdo vendim të shkallës së parë Gjykata e Apelit e kthen në rigjykim, kur edhe pas vendimit përfundimtar nuk zbatohen vendimet", tha Preteni për "Kosova Sot". Sipas tij në këtë sistem ka errësirë të plotë dhe mungesë llogaridhënie për t'i mbuluar dështimet dhe abuzimet. "Efikasiteti, transparenca dhe llogaridhënia, do të ishin garanci e fuqishme e funksionalizimit të shtetit, kujdesi në shpenzimin e parasë publike, si dhe kujdesi në marrjen e vendimeve do të ishin në nivelin shumë më të lartë nëse "gjyqësori" do të ishte më efikas. Frika nga ndëshkimi nuk ekziston te ne dhe ky është i tërë problemi. Mungesa e transparencës, mungesa e llogaridhënies dhe mungesa e dënimit për veprimet joligjore shpien drejt anarkisë, prandaj fatkeqësisht jemi larg shtetit të së drejtës funksionale e të pavarur", tha Hasan Preteni për "Kosova Sot".