KAPITI: NË KOSOVË NUK SUNDON AS LIGJI, AS DREJTËSIA DHE AS SHTETI DEMOKRATIK

 Ndërsa, analisti dhe eksperti tjetër i kësaj fushe, Skënder Kapiti, tha për "Kosova Sot" se sikurse në Kosovë, ashtu edhe në Shqipëri, nuk sundon as ligji, as drejtësia dhe as shteti demokratik, sepse aparati shtetëror, të gjitha pushtetet, institucionet e tij janë kapur nga interesat private të politikës, të parive të partive politike, të pushtetit, të drejtësisë dhe të atyre që kanë marrë e rrëmbyer poste publike e shtetërore. "Një gjendje e tillë ka shkatërruar potencialet dhe kapacitetet e luftës kundër krimit të organizuar, vjedhjes dhe korrupsionit. Kjo gjendje e rëndë është shumë e vështirë, gati e pamundur për t'u kapërcyer. Kjo, sepse forcimin, sundimin dhe kthimin e besimit te ligji, te drejtësia, te demokracia nuk e bëjnë me këto institucione shtetërore të kapura nga krimi e korrupsioni. Pra, drejtësia dhe ligji në Kosovë tashmë nuk janë problem për institucionet e shtetit, por atyre ndryshimi u vjen vetëm po qe se transformohet dhe reformohet shoqëria", shpjegoi Kapiti. "Shoqëria transformohet së pari duke u edukuar juridikisht, politikisht dhe demokrarikisht, si dhe duke marrë guximin politik e demokratik për të vepruar kundër kësaj elite politike, duke e ndëshkuar dhe duke e dëbuar atë nga politika dhe nga pushteti. Shoqëria fillon të transformohet vetëm atëherë kur ajo vepron aktivisht me protesta të pandërprera dhe në emër të drejtësisë dhe kundër krimit e korrupsionit shtetëror e institucional", tha Skënder Kapiti për "Kosova Sot".