Beogradi e pranon: Asociacioni as që mund të krahasohet me “Republikën Serbe"
Mediat në Serbi raportojnë se Asociacioni i komunave me shumicë serbe në Kosovë nuk mund të krahasohet fare me të ashtuquajturën “Republikë Serbe” në Bosnje e Hercegovinë.
Ky Asociacion, sipas marrëveshjes së zbardhur nga vetë Bashkimi Evropian, do të jetë në përputhje të plotë me ligjet e Kosovës.
Portali i njohur beogradas “B92” shkruan se ndonëse Beogradi do të mund t’u ndihmojë serbëve të Kosovës financiarisht në fusha që kanë të bëjnë ngushtësisht me jetën e përditshme, përgjegjësia më e madhe do të bie mbi supet e vetë serbëve vendas. Kjo nënkupton se Serbia do ta ndërrojë përfundimisht kursin politik ndaj Kosovës, duke ua lënë serbëve lokalë të vendosin për fatin e tyre.
Nenad Gjurgeviq nga “Forumi për marrëdhënie etnike në Beograd”, ka thënë se përgjegjësinë kryesore do ta kenë njerëzit e zgjedhur në komunat gjegjëse, sepse ata do të jenë pjesë e Asociacionit.
Gjurgjeviq ka vlerësuar se krahasimi mes përgjegjësive të Asociacionit me ato të “Republikës Serbe” është krejtësisht i pamundur, transmeton lajmi.net.
“Shikuar edhe ligjërisht, Asociacioni nuk do të jetë kurrfarë pushteti i tretë,” theksoi Gurgjeviq dhe shtoi se ky mekanizëm as që mund të krahasohet me “Republikën Serbe” sepse Asociacioni, thjesht, nuk i ka kompetencat dhe statusin që “Republika Serbe” e gëzon në kuadër të Bosnje e Hercegovinës.