Ulen temperaturat në Shqipëri, nis bora…

Kjo është fundjava e fundit me temperatura të larta, që në fakt ashtu siç e kanë përcaktuar edhe sinoptikanët kanë qenë temperatura të pazakonta gjatë gjithë muajit Tetor.

Duke filluar nga e hëna, temperaturat do të ulen me rreth 7 gradë. Madje në ditë të veçanta nuk do të mungojnë edhe reshjet e shiut.

“Pritet të kemi një rënie me 2-3 gradë ditën e diel, ulje e ndjeshme pritet të hënën, të martën kryesisht në vlerat maksimale që ishin 28-29 gradë, do të jetë 20-21 gradë”.

Por cilat janë ditët që vendi do të përfshihet nga reshjet e shiut?

“Duke filluar që nga dita e hënë, ku pritet që pjesa më e madhe e territorit do të rrezikohet nga vranësira dhe shira, situatë që do të vijojë edhe të martën. Do kemi një ndërprerje ditën e mërkurë, për t’u rikthyer të enjten dhe gjithë javën tjetër”, tha sinoptikania per Klan.

Sipas sinoptikanëve, temperaturat e ulëta që do të përfshijnë gjithë vendin do të shoqërohen edhe me reshje dëbore.

“Java tjetër sidomos e hëna gjatë natës dhe e marta do të rrezikohet nga reshje dëbore në majat e maleve”. Edhe pse muaji Tetor po mbyllet me temperatura të ulëta, Nëntori sjell temperatura më të larta se vlerat normale.

(Kosova Sot)