Mustafa: Asociacioni nuk është problem, por hyxhymi për të ardhur në pushtet

Kryeministri i Kosovës, Isa Mustafa, ka përsëritur edhe një herë se nuk do ta tërheq nënshkrimin nga marrëveshjet e fundit të arritura me Serbinë.

Në një postim në Facebook ,Mustafa ka përkujtuar se marrëveshjet e nënshkruara me palën serbe nuk janë bërë me dëshirë dhe vendim të kryeministrit apo Qeverisë, por si obligim ndërkombëtar, transmeton gazeta Kosova Sot Online.

Ai ka thënë se në vendin tonë nuk është problem Asociacioni i komunave serbe e as demarkacioni me Malin e Zi, por dëshira e Opozitës për të ardhur në pushtet jashtë rregullave demokratike.

Ai gjithashtu ka thënë se Asociacioni do të dërgohet në Gjykatë Kushtetuese, pasi sipas tij, kjo do ta kosultojë çdo pikë të marrëveshjes nëse ka shkelur kushtetutën e vendit.

Lexoni të plotë postimin e Mustafës:

Për vendin tonë nuk janë problem real as Asociacioni dhe as Demarkacioni me Malin e Zi. Problem është abstenimi në zbatimin e ligjit dhe rregullave, që stimulon hyxhymin e dhunshëm për të ardhur në pushtet jashtë rregullave demokratike.

Asociacioni, Jo! Sepse, është Gjykata Kushtetuese ajo që vlerëson çdo pikë të marrëveshjes, dhe nëse del se edhe një pikë nuk është në harmoni me Kushtetutën ajo nuk do të implementohet.

I përkujtoj të gjithë ata që e dinë dhe ata që nuk e dinë se Asociacioni themelohet, jo me vendim dhe dëshirë të Kryeministrit apo Qeverisë, por si obligim për ta zbatuar Ligjin për Ratifikimin e Marrëveshjes Ndërkombëtare për Normalizimin e Marrëdhënieve ndërmjet Republikës së Kosovës dhe Republikës së Serbisë, të votuar nga 84 deputet të Kuvendit të Republikës së Kosovës. Prandaj nuk mund të flitet për tërheqje të nënshkrimit, por për zbatim të ligjit.

Marrëveshja e demarkacionit nuk është as Bibël e as Kuran, dhe nëse dikush mund të vërtetoj me evidencë të qëndrueshme se, jo dhjetëmijë hektarë por, edhe një metër katrorë ka kaluar nga territori ynë në Mal të Zi, do të kërkohet korrigjim. Por deri sot askush nuk ka ardhur ta dëshmoj këtë. Kurse, gjeografët tanë duhet ta kenë një qëndrim lidhur me sipërfaqen e territorit të Republikës së Kosovës. Ky territor nuk është llastik. Disa shkruajnë për 10877, disa 10887, disa 10906 e disa mua më deklarojnë në zyrë se ky territor arrin në 10960 kilometra katrorë?! Ne kemi shkencëtarë e akademikë, të cilët kanë dije dhe munden, pa u ndikuar politikisht dhe pa orekse territoriale, të jenë të saktë në dëshmimin historik të vijave kufitare në të cilat është shpallur pavarësia e Kosovës.

(Kosova Sot)