Mogherini merr garanci për zbatimin e marrëveshjeve

Kërkesa më e re e Gjermanisë duket se ka reflektuar edhe në disponimin e kryeministrit serb, Aleksandar Vuçiq. Ai është parë i mërzitur në darkën e punës në Bruksel të thirrur nga Mogherini, e ku kanë marrë pjesë edhe kryeministri Mustafa me zëvendësin e tij, Hashim Thaçi.

Ndërmjetësuesja e darkës joformale, Mogherini ka thënë se ka marrë garanci nga të dyja palët për zbatimin e marrëveshjeve, sidomos atë të 25 gushtit për Asociacionin.

“Në kontekst të dialogut ndërmjet Prishtinës dhe Beogradit, Federica Mogherini e ka organizuar sonte një darkë me kryeministrat Aleksandar Vuçiq dhe Isa Mustafa. Të dy kryeministrat kanë pasur një diskutim të hapur për situatën rreth dialogut, në veçanti sa i përket zbatimit të marrëveshjeve të 25 gushtit. Të dyja palët e përsëritën përkushtimin e tyre për zbatimin e të gjitha marrëveshjeve të kaluara”, thuhet në njoftimin e zyrës për informim.

Pas takimit është prononcuar ministri i jashtëm serb, Ivica Daçiq i cili ka thënë se Beogradi do të zbatojë të gjitha marrëveshjet e arritura deri më tash me Prishtinën, por nuk do të shkojë asnjë hap përtej kësaj.

Ai ka refuzuar të komentojë kushtet e reja për Serbinë, që është pranimi indirekt i Kosovës, duke pohuar se kjo është në kompetencë të kryeministrit Vuçiq.

E, teksa Daçiq e delegacioni serb kanë komentuar darkën me të përfunduar, kryeministri Mustafa akoma nuk ka dhënë asnjë prononcim për takimin.