Jahjaga: Kosova sot shënoi golin më të bukur në historinë e saj të futbollit

Për pranimit e Kosovës në UEFA ka uruar edhe ish Presidentja e vendit, Atifete Jahjaga.

Jahjaga, ndër të tjerash ka thënë se ëndrra e sportistëve kosovarë u bë realitet, transmeton gazeta Kosova Sot Online.

Ja deklarata e plotë e Jahjagës:

“Kosova sot shënoi golin më të bukur në historinë e saj të futbollit, anëtarësimin në UEFA. Ky hap është kurorëzim i shumë përpjekjeve diplomatike dhe një të drejte të pamohueshme për sportistët, që sot janë bërë ambasadorët më të zëshëm të vendit tonë, të cilët po na bashkojnë të gjithëve me krenari rreth flamurit të Republikës së Kosovës.

Sot më shumë se kurrë, përkujtojmë sakrificën e gjeneratave të kaluara, të cilat luajtën nëpër fusha të improvizuara me kushte minimale, me baltë, duke ëndërruar që golat e tyre një ditë do të tejkalonin kufijtë.

Sot kjo ëndërr u bë realitet. U mbetet sportistëve të rinj të vazhdojnë të na bëjnë kampionë dhe të jenë krenarë që përfaqësojnë një shtet, qytetarët e të cilit me zemër do t'i mbështesin në secilin hap dhe në secilin gol drejt triumfit”, ka shkruar ish Presidentja në Facebook.

(Kosova Sot)