Të gjithë në mbrojtje të shtetit!

Të gjithë në mbrojtje të shtetit!
  • 22 July 2018 - 07:45
SHKRUAN: FLORIM ZEQA 

Në historinë e parlamentarizmit kosovar nuk mbahet mend të ketë qenë një legjislaturë më pasive, më e dobët dhe më e dëmshme për interesin e shtetit dhe qytetarëve. Sikurse që nuk mbahet mend, të ketë pasur ndonjëherë pushtet më antipopullor dhe opozitë më heterogjene në Kuvendin e Kosovës. Përderisa pozitën dhe opozitën i ndanë pushteti në gjysmë shtet, është "grazhdi i krimit" në parlament, ai që i bashkon të përgjumosurit e politikës

Hyrja e Kosovës në bisedime si palë e pabarabartë, gjegjësisht si subjektivitet nën Rezolutën 1244 të KS të OKB-së, e jo si shtet i pavarur, përkatësisht me fusnotë* e pa Republikë, e ka bërë Serbinë superiore në të gjitha takimet, duke e trajtuar Kosovën herë si provincë (krahinë) e herë si koloni të saj! Nga fillimi i bisedimeve e deri më sot, politika kosovare në dialog me Serbinë ka qenë pa krye dhe pa platformë të bisedimeve, duke e ulur tej mase peshën e bisedimeve, të cilat janë realizuar gjithmonë në favor të Serbisë. Negociatorët kosovarë në bisedimet me Serbinë në Bruksel asnjëherë nuk kanë qenë në nivelin e përgjegjësisë shtetërore, si në aspektin formal ashtu edhe atë praktik. Si i tillë çfarë është, delegacioni i Kosovës edhe në takimin e fundit nuk ishte në gjendje të ngritë nivelin e bisedave me Serbinë në nivel shtetëror, as të kërkojë pasurinë e Kosovës në ish-Jugosllavi, dëmet e luftës, përmes të cilave do të mund të amortizohej politika serbe deri në atë masë sa të kërkojë zgjidhje kompromisi me Kosovën! Presidenti Thaçi, i vetëzgjedhur kryenegociator i fazës finale të bisedimeve me Serbinë në Bruksel, ditëve të fundit ishte i fokusuar në blerjen e opozitës së përçarë kosovare, në mënyrë që t'ia sigurojë vetes nënshkrimin e marrëveshjes finale me Serbinë, gjë e cila mund të ketë edhe pasoja të rënda për të ardhmen e Kosovës. Kundërshtimi i zbehtë i opozitës kosovare për rolin prijës të Hashim Thaçit në bisedimet me Serbinë, është vetëm një zhurmë për poenë elektoralë, pasi opozita nuk po arrin që ta shfrytëzon fuqinë e votës për ta "kryqëzuar" presidentin në Kuvend, për ta kushtëzuar me tema kulmore të interesit strategjik për Kosovën, ose ta bëjë shkarkimin e tij dhe ndërprerjen e menjëhershme të dialogut final (fatal) me Serbinë, derisa kjo e fundit të njoh pavarësinë e shtetit tonë, e bashkë me këtë edhe integritetin territorial të Republikës së Kosovës të njohur ndërkombëtarisht.

Rekomandimi mashtrues për liberalizim Lajmi i kamufluar dhe plot hipokrizi i komisionerit evropian, Dimitris Avramopoulos, ishte lojë diplomatike për ta nxjerrë Thaçin nga stresi dhe pozita e rënd pas takimit me Vuçiqin. Qytetarët e lodhur nga denigrimi social dhe varfëria ekstreme e pranuan gati si punë të kryer lajmin e kamufluar për liberalizim të vizave, pa u plotësuar fare kushti themeltar për liberalizim të vizave, ai i luftimit të korrupsionit dhe krimit të organizuar. Mbetët i pajustifikueshëm fakti i fshehjes së lajmit më të rëndësishëm të ditës së mërkurë 18 Korrik 2018-të! Askush nga gazetarët shqiptarë nuk e pyeti presidentin Thaçi për "takimin e shkurtër, por të rëndë", nga mimika e të cilit u vërejt tronditja që kishte pësuar nga takimi me Vuçiqin. Kur lajmi i "mirë" e pason lajmin e keq, është sinjal alarmues për vendin. Lajmi i parë, i keq për Kosovën erdhi nga presidenti i trishtuar Hashim Thaçi; "Ishte ky takimi më i shkurtër dhe më i rënd përgjatë këtyre gjashtë viteve të negociatave me Serbinë!!! I menjëhershëm na doli lajmi i"mirë" sa befasues po aq i papritur i Komisionit Evropian, kinse Kosova i ka përmbushur të gjitha standardet për liberalizim të vizave, ani pse lufta kundër korrupsionit dhe krimit të organizuar në Kosovë akoma nuk ka filluar! Çmimin e rekomandimit të Komisionit Evropian, Kosova e vogël e pagoi shumë shtrenjtë, madje edhe më shtrenjtë se që është pritur. Përveç faljes së 8200 hektarëve tokë Malit të Zi, siç duket Serbia nuk u mjaftua vetëm me veriun e vendit, të dhënë dhuratë nga Thaçi më 19 prill 2013 dhe Isa Mustafa më 25 gusht 2015 në Bruksel,...të miratuar dhe legjitimuar nga deputetët shqiptar në Kuvendin e Kosovës! Presidenti serb, Aleksandër Vuçiq kësaj radhe i kërkoj diçka më shumë homologut kosovar Hashim Thaçi...! Andaj, në këtë rast, duhet kërkuar llogari nga presidenti Thaçi, që të zbërthejë dhe të sqarojë për opinionin publik kosovar, çfarë në të vërtetë përmban "takimi më i shkurtër dhe më i rëndë përgjatë këtyre gjashtë viteve të negociatave me Serbinë". Kjo është esenca e problemit me të cilin duhet të merren sot kosovarët, e jo të llogaritin në afatet kohore për largim nga vendi i tyre. Mirëpo, sikurse deri më tani, nuk pritet llogaridhënie dhe transparencë nga presidenti Thaçi,...i cili, vetëm pas nënshkrimeve fatale në Bruksel e njofton Kuvendin, së bashku me presionin ndërkombëtar për miratim të marrëveshjeve antikushtetuese dhe të dëmshme për vendin.

Rreziku nga dialogu me Serbinë është i madh, shumëdimensional Amnistimi i kriminelëve serbë do të thotë shpëlarje e duarve me gjakun e shqiptarëve! Në këtë rast, qytetarët e burgosur në gjysmë shtetin e Kosovës, të vetmin shpëtim e shohin largimin sa më parë nga vendi i tyre në kërkim të një jetë të re në shtetet europerëndimore. Edhe pse me vonesë dhe çmim tejet të lartë për vendin, përfundimisht kanë filluar të bien maskat e partive në pushtet të cilat mashtruan e tradhtuan qytetarët se me demarkacionin menjëherë vjen liberalizimi i vizave! E shiten ratifikimin e demarkacionit gjoja si kusht për liberalizimin e vizave për të shpëtuar lëkurën e tyre nga "Specialja". Të njëjtët që e votuan demarkacionin, siç duket nuk i kishin bërë mirë llogaritë,...nuk e kishin menduar fare dialogun me Serbinë, i cili do t'i bëjë që shumë shpejt ta harrojnë demarkacionin me Malin e Zi, çfarë sfidash do të sjellë demarkimi i kufirit me Serbinë.

Mbrojtja e shtetit të Kosovës, obligim kombëtar Andaj, më i rëndësishëm se liberalizimi i vizave, është ekzistenca e shtetit, ruajtja e sovranitetit dhe integritetit territorial të vendit tonë. Me ose pa liberalizim të vizave, përsëri do të udhëtojnë ata që kanë para, ndërsa qytetarët e varfër do të përballen me kafshatën e gojës dhe "botën e vogël" që i rrethon! Liberalizimi i vizave pa sundim të ligjit dhe pa asnjë perspektivë zhvillimore, mund të jetë fatale për të ardhmen e vendit tonë. Qytetarët, paraprakisht largimit nga Kosova, duhet ta ndëshkojnë këtë klasë politike që ua bëri jetën ferr! Sikur të kishim një klasë politike të përgjegjshme, paraprakisht liberalizimit do të kishim zhvillim ekonomik dhe mirëqenie për qytetarët, atëherë lëvizjen e lirë do ta kishim përjetuar si diçka normale e jo si çështje ekzistenciale! Për të qenë shqetësimi më i madh për shtetin, duket një pajtueshmëri në heshtje me pushtetarëve dhe popullatës së pashpresë në Kosovës. Qytetarët janë duke i pritur vizat, si shpëtim për të ikur nga vendi, pushtetarët akoma më të gëzuar për mbajtjen përjetësisht të pushtetit në gjysmë shtet! Realitet i hidhur dhe fatkeq. Qytetarët të cilët jetojnë në varfëri e të pashpresë në vendin e tyre, e mendojnë ardhmërinë e tyre jashtë tij,...duke mos llogaritur fare në pasojat e asimilimit deri në tretje finale në shtetet e huaja.

Legjislatura më e papërgjegjshme e Kuvendit të Kosovës Në historinë e parlamentarizmit kosovar nuk mbahet mend të ketë qenë një legjislaturë më pasive, më e dobët dhe më e dëmshme për interesin e shtetit dhe qytetarëve. Sikurse që nuk mbahet mend, të ketë pasur ndonjëherë pushtet më antipopullor dhe opozitë më heterogjene në Kuvendin e Kosovës. Përderisa pozitën dhe opozitën i ndanë pushteti në gjysmë shtet, është "grazhdi i krimit" në Parlament, ai që i bashkon të përgjumosurit e politikës. Deputetët që nuk i zë gjumi, kohën e kalojnë duke bërë "selfije" në Parlament. Ndërsa pjesa tjetër e deputetëve të "rebeluar", ua prishin gjumin kolegëve të tyre duke çuar pluhur në ajër, me ndonjë përplasje verbale kinse për keqpërdorimet e fondeve të luftës apo shtyrje bërrylash në stilin e "Buajve në baltë"! Ishte ky një përshkrim sa metaforik, po aq real që ndodh në të gjitha seancat e kësaj legjislature të Kuvendit të Republikës së Kosovës. Pasi Kuvendi i Kosovës, gjegjësisht si pozita ashtu edhe opozita, kanë rënë në gjumë të thellë, thuajse fare nuk ekzistojnë, shkaku i implikimit në aferat korruptive dhe kriminale gjatë periudhës sa ishin bashkë në pushtet. Opozita ka frikë t'i kundërvihet pushtetarëve, ndryshe, në Kuvend nuk dallohet më se kush është pozitë e kush opozitë në parlamentin kosovar, pasi janë njëjtë të korruptuar, njëjtë të kriminalizuar dhe njëjtë të papërgjegjshëm karshi qytetarëve të vendit. Prandaj, jo vetëm pajtueshmëria e qytetarëve me realitetin e hidhur, është edhe një pajtueshmëri e pashpallur mes subjekteve politike në Kuvendin e Kosovës. Në dakordim të plotë me njëra-tjetrën, subjektet politike në Kuvend, me përjashtim të VV-së, votuan pro-faljes së 8200 hektarëve tokë të Kosovës, Malit të Zi. Ngjashëm, por akoma më keq po sillen ndaj dialogut me Serbinë. Deklarativisht e kundërshtojnë, por në fakt nuk e ndërmarrin asnjë veprim konkret për të parandaluar të keqën e madhe që po i vjen Kosovës nga dialogu vrastar me Serbinë në Bruksel. VV-ja, që dikur rrokulliste kamion me mallra të Serbisë, mbulonte në tym e flakë parlamentin e Kosovës në emër të mbrojtjes së territorit nga marrëveshja për Demarkacionin me Malin e Zi,...tani kur janë në pyetje dhjet fish më shumë territore dhe humbje enorme e sovranitetit të shtetit, nuk e kemi asnjë një lëvizje pozitive, asnjë protestë apo demonstrim pakënaqësie ndaj dialogut të Brukselit! Shpresa për ndryshime ekziston "Shpresën" e vetme që ua japin popullit pushtetarët aktualë është ikja nga vendi! Në situatën aktuale, kur shtetit i mungon forca opozitare, Kosovën dhe qytetarët e saj mund t'i shpëtojë vetëm një forcë e re politike e ngjizur nga Diaspora, me intelektualë dhe atdhetarë të devotshëm, biznesmen dhe kuadro profesionale të fushave dhe lëmenjve të ndryshme dhe në bashkëpunim me të gjitha forcat progresive vendore, elitat intelektuale të nëpërkëmbura nga pushtetarët aktualë, mediet e pavarura, analistë dhe gazetarë të guximshëm që demaskojnë deri në fund keqpërdorimet nga periudha e luftës dhe pasluftës, krimin e organizuar dhe korrupsionin 20- vjeçar në të dyja nivelet e qeverisjes, sistemin e drejtësisë dhe abuzimet me paratë publike të partive politike në pushtet dhe opozitë. Mashtrimi me vizat dhe themelimin e ushtrisë, janë tendencë e hapur për mbulimin e hajnisë, korrupsionit dhe krimit të organizuar. Asnjë popull në rruzullin tokësor nuk do të pranonte faljen e tokave stërgjyshore në këmbim të lëvizjes së lirë drejt vendeve të tjera! Edhe pse i vështirë, akoma nuk është i pamundur parandalimi i së keqes më të madhe para së cilës ndodhet Kosova. Me një klasë të re politike, liderë të pastër dhe të përgjegjshëm që vënë interesin e shtetit para çdo interesi personal, është e mundur të përmirësohet imazhi i keq për Kosovën dhe të hiqen etiketat për shtet dhe qeveri të kriminalizuar, në të dyja nivelet e qeverisjes. Andaj, nëse me të vërtetë e duam Republikën e Kosovës si shtet tonin, të ngrihemi të gjithë në mbrojtje nga invazioni serb. Mirëpo, paraprakisht duhet ta bëjmë largimin e uzurpatorëve nga pushteti dhe pastrimin e skenës politike dhe të gjitha institucionet e shtetit nga të korruptuarit dhe inkriminuarit, nga hajdutët e matrapazët e të gjitha llojeve e ngjyrave.

(Kosova Sot)