A do ta pranojë Serbia marrëveshjen?

Publikuar: E diel 31 Mars 2013, 17:56 0 Komente

Palës serbe përherë i ka munguar sinqeriteti

Shkruan: Mr. Bislim ALIU

Pa mëdyshje, bisedimet me Serbinë ishin gjithherë të vështira. Meqë çdo dialog apo bisedë, që është bërë me Serbinë, ajo përherë i politizonte dhe vazhdimisht i bënte sikur Kosova është pjesë e Serbisë! Ndaj, mu për këtë shkak, Kosova në Kushtetutën e saj figuronte si pjesë përbërëse e saj. Dhe, që nga fillimi i dialogut gjithmonë fillonte nga kjo e dhënë. Pra, kishim të bëjmë me një shtet që absolutisht nuk ka fare mirëkuptim ndaj Kosovës dhe, përherë në dialog i mungonte sinqeriteti për bisedime. Në secilin raund të bisedimeve, Serbia na dilte me lloj-lloj planesh dhe sihariqe të reja, për zgjidhjen e problemeve të Kosovës. Dhe, sipas tyre, problemet e Kosovës mund të zgjidhen vetëm nëpërmes Serbisë dhe assesi ndryshe! Ndaj, dalëngadalë, që nga fillimi, kur ato edhe u quajtën bisedime teknike, ajo i pranonte marrëveshjet, ama asnjëherë ajo nuk i realizonte. E, më vonë, ato biseda teknike u shndërruan në bisedime politike, edhe pse që nga fillimi ishin bisedime politike, meqë Serbia çdo gjë e politizon. Edhe në raundin e shtatë të bisedimeve mes dy kryeministrave nuk u arrit marrëveshja shumë e kërkuar. Zyrtarët serbë reaguan në atë që po u ofron Brukseli. Në anën tjetër, Prishtina zyrtare është zotuar se nuk do të pranojë asnjë plan që e tejkalon Pakon e Ahtisarit dhe Kushtetutën e Kosovës. Me këtë vallë a do të përsëritet historia? Siç dihet edhe më parë, kur delegacionet u mbyllen në kështjellën e Rambujës, Serbia e refuzoi planin. Ama, njësoj ngjau edhe me negociatat e Vjenës, që sollën Pakon e Ahtisarit, kur sërish refuzoi Serbia dhe nuk e pranoi planin ndërkombëtar! Dhe, tani, a thua çka do të ndodh në kryeqendrën evropiane? Zaten, në këtë pyetje është tejet vështirë të parashikohet, meqë Beogradi ende e mban mentalitetin e vjetër, edhe Kosovën edhe BE-në?!

Pritjet nga raundi i tetë

Mirëpo, kësaj radhe, sipas të gjitha gjasave, Serbia është mbështetur për muri! Pra, sipas të gjitha gjasave, në raundin e shtatë iu ka ofruar dokument-marrëveshja nga BE-ja, që asociacioni i komunave serbe të realizohet sipas ligjeve të Kosovës. Në atë moment Serbia marrëveshjen nuk e pranoi, por në realitet edhe nuk e refuzoi, e kur e pa se Baronesha Eshton u kërcënua se o pranim o ndërprerje të bisedimeve, atëherë kryeministri serb kërkoi edhe një kohë shtesë për t’u konsultuar me institucionet e tjera të Serbisë. Ndaj, sipas të gjitha gjasave, Serbia nuk ka kah t’ia mbajë dhe nuk ka shkon. Serbia gjithsesi, duhet ta ndryshoj qasjen ndaj Kosovës dhe ndaj politikës hegjemoniste që pati ndaj Kosovës që 150 vjet. Më në fund mendoj se Serbia do ta nënshkruar marrëveshjen, megjithatë është e mundshme që ajo si një lypsare do t’i kërkojë edhe ca kompetenca të zgjeruara për asociacionin. Megjithatë, kjo nuk do të lejohet për asnjë milimetër zgjerim të kompetencave për asociacionin e komunave serbe. Asociacioni i komunave do të funksionojë në bazë të ligjeve të Kosovës dhe assesi ndryshe. Edhe së fundi dorëzimi i dokumentit prej gjashtë pikësh do të duhej të studiohej mirë dhe nuk ka variante dykuptimësie ose ndonjë mendim shtesë. Ndaj, me vëmendje të studiohet dhe menjëherë të reagohet. Dhe, nuk ka asnjë mendim dhe ide tjetër, përpos Pakos së Ahtisarit dhe Kushtetutës së Kosovës. Në këtë duhet të qëndrohet dhe assesi ndryshe. Megjithatë, shikuar gjer më tani rrjedhën e bisedimeve të gjithmbarshme Kosovë-Serbi, në njëfarë mënyre mund të konstatohet se edhe raundi i tetë i bisedimeve sikur mund të jetë i paparashikueshëm.

 

 

 

 

 

 

 

Printo Dërgo
  • di

Komente


Opinionet e fundit

arkivi i lajmeve