Nuk ka "Shqipëri të madhe" as të vogël në Ballkan, por vetëm një Shqipëri etnike

Publikuar: E hëne 18 Mars 2013, 18:13 0 Komente

Manipulimet e propagandës dhe diplomacisë antishqiptare

Përderisa të mos zgjidhet çështja koloniale shqiptare, Ballkani do të jetojë në “ethe lufte”!

Shkruan: Prof. Dr. Mehdi HYSENI

Manipulimi dhe manovrimi politiko-propagandistik dhe diplomatik serbo-sllav me parullën “Shqipëria e madhe” ka tre rreziqe, i pari, që shqiptarët t’i heshtë nëpër rezervatet ekzistuese koloniale serbo-malazeze-maqedonase dhe greke, duke përdorur masat represive dhe terrorizuese kundër shqiptarëve, me qëllim të mohimit të lirive dhe të së drejtës së vetëvendosjes së tyre; i dyti, të ruajnë “gjahun” e tyre kolonial, duke fajësuar shqiptarët për pretendimet territoriale ndaj vendeve fqinje dhe i treti, përfitimi i faktorëve evropianë ndërkombëtarë në ruajtjen e statu-kuos së problemit të pazgjidhur kolonial shqiptar në Ballkan. Ja, kjo është e tëra, "sulmi është mbrojtja më e mirë"! Sa do të zgjasë ky farë sulmi dhe kjo farë rrene shekullore serbo-sllave "Velika Albanija" kundër etnikumit indigjen shqiptar dhe Shqipërisë etnike në Ballkan, kjo varet nga politikat shqiptare. Nëse ato, edhe më tej luajnë në "letrën" e demaskimit dhe të mohimit të së drejtës së vetëvendosjes dhe të ribashkimit të kombit shqiptar dhe të Shqipërisë etnike, atëherë serbo-sllavët ballkanikë me gënjeshtrën e tyre "Velika Albanija", do ta kontaminojnë me blozë dhe me "pirit", jo vetëm florën dhe faunën e qenies së Shqipërisë etnike, por tërë rajonin dhe Evropën. Kështu që, edhe për 100 vite të tjera, gjysma e shqiptarëve dhe e Shqipërisë etnike do të ngelë nën vargonjtë e tiranisë kolonialiste dhe imperialiste serbo-sllave.

Qarqet serbe nuk duan ta pranojnë të vërtetën

Shqiptarët nuk iu kanë këputur asnjë pëllëmbë toke as Serbisë, as Malit të Zi e as Greqisë, por është e kundërta, këto shtete u kanë borxh të madh shqiptarëve, sepse me luftëra dhe me gjenocid shekullor (1878-2013), kanë pushtuar dhe copëtuar më se 50 për qind të territorit autokton të shqiptarëve dhe Shqipërisë etnike. Ky është argumenti i parrëxueshëm historik, politik dhe juridik, që provon se as në teori e as në praktikë nuk ekziston kurrfarë “Shqipërie e madhe”, por vetëm një Shqipëri etnike shqiptare, e copëtuar dhe e kolonizuar nga Beogradi, nga Podgorica, nga Athina dhe nga Shkupi. Kjo është e vërteta, të cilën nuk duan ta pranojnë qarqet zyrtare politike, as akademitë e as kishat serbo-sllave ballkanike, sepse do të humbnin pronat e tyre koloniale shqiptare, të plaçkitura në mënyrë barbare dhe joligjore (1878-2013). Kolonialistët dhe neokolonialistët e dikurshëm dhe të sotshëm serbo-malazezë, grekë e maqedonas, i akuzojnë shqiptarët gjoja për nacionalizmin, që në fokus ka krijimin e një “Shqipërie të madhe”, që sipas tyre po e “rrezikuaka” sigurinë dhe paqen në Ballkan, por kjo nuk është e vërtetë, sepse shqiptarët kurrë nuk kanë pasur dhe nuk kanë pretendime dhe aspirata nacionaliste që t’i pushtojnë territoret e vendeve fqinje, por është e kundërta, me të drejtë kanë luftuar dhe vazhdimisht në mënyrë paqësore po kërkojnë, duke u bazuar mbi të drejtën e tyre historike dhe legjitime, që t’i rikthejnë vetëm territoret e tyre të Shqipërisë etnike, të grabitura me luftë dhe me gjenocid nga Serbia, nga Mali i Zi dhe nga Greqia.

Ekziston vetëm një Shqipëri etnike

Kjo tezë akuzuese antishqiptare, është mbrojtja më e fuqishme dhe më e sigurt e territoreve të grabitura të Shqipërisë etnike nga ana e Serbisë së Madhe, e Greqisë, e Malit të Zi dhe e Maqedonisë. Derisa të manipulohet me këtë tezë të falsifikuar serbo-sllave, zgjidhja e çështjes koloniale shqiptare në Ballkan, do të qëndrojë limbo sikurse këtu e 100 vitet e shkuara (1912-2013). Që në fillim ia vlen të theksojmë se që nga shfaqja e shqiptarëve në Gadishullin Ballkanik e deri më sot, nuk ka pasur dhe nuk ka kurrfarë “Shqipërie të madhe”, as të vogël, por ekziston vetëm një Shqipëri e banuar me etninë shqiptare, që quhet Shqipëri etnike. Kjo është e vërteta, që në çdo aspekt kuptimor të përmbajtjes e përgënjeshtron konceptin “Shqipëri e Madhe”, koncept ky, i cili, kur të “përkthehet” në gjuhën politike të kolonializmit dhe të hegjemonizmit, do të thotë gllabërimin e territoreve të huaja të vendeve fqinje të Shqipërisë etnike, siç janë Greqia, Serbia, Mali i Zi dhe Maqedonia. Mirëpo, kjo, e ashtuquajtura “Shqipëri e madhe” nuk ka të bëjë as me shqiptarët e as me Shqipërinë, por vetëm kolonialistët e djeshëm dhe me neokolonialistët e sotëm serbë, malazezë, grekë dhe maqedonas, të cilët edhe sot në shekullin XXI (viti 2013), në kundërshtim me të drejtën historike dhe me të drejtën e vetëvendosjes së shqiptarëve mbi Shqipërinë etnike, ende mbajnë nën sundimin e tyre të egër kolonialist dhe hegjemonist të më se gjysmës së territoreve të shqiptarëve dhe të Shqipërisë etnike. Me gjithë përpjekjet e pareshtura të “teknologjisë” strategjike të bashkësisë ndërkombëtare, që vendet ballkanike t’i përfshijë në mekanizmat dhe në proceset e agjendës afatgjatë të integrimeve evropiane dhe rajonale, kjo në kuptimin real pragmatik, është vështirë të realizohet, sepse çështja koloniale shqiptare, e pazgjidhur qe më se një shekull, është barriera kyçe që pengon jetësimin e një koncepti të këtillë dhe që Ballkanin e mban vazhdimisht në ethe lufte. Si rrjedhim, për të dalë nga një rreth i këtillë vicioz i kënetës koloniale serbomadhe dhe i ushtrimit të trysnisë së faktorit ndërkombëtar, që kanë “paktuar”, që Kosova dhe trevat e tjera indigjene të Shqipërisë etnike, (në emër, dhe për hir të agjendave integruese rajonale, që përbëjnë boshtin vertebral të interesave komplementare të fuqive të mëdha botërore) të ngelin edhe më tej “çifliqe” koloniale të Serbisë dhe Malit të Zi, si dhe të substratit të tyre sllav (Greqia dhe Maqedonia).

Çlirimi antikolonial

Teza “Shqipëria e madhe” nuk është argument historik, shkencor, as politik, por vetëm gënjeshtër propagandistike e mbrojtjes së tezës “Serbia e madhe”(!) Pse politika, propaganda dhe diplomacia serbo-malazeze antishqiptare manipulojnë me “armën” e tyre “Shqipëria e madhe”, për historinë, për politikën as për opinionin publik shqiptar, as për atë ballkanik dhe evropian, nuk është ndonjë tezë apo argument i ri apo i vjetër i kuazishkencës dhe i kuazipolitikës së Serbisë dhe Malit të Zi, por si dikur, ashtu edhe sot, manipulimi dhe spekulimi i serbomëdhenjve me të është vetëm shpifje propagandistike e shovinizmit dhe e hegjemonizimit serbo-malzez në disfavor të çlirimit antikolonial të Kosovës, përkatësisht të Shqipërisë etnike. Pse disa shtete të Evropës së dikurshme të “Koncertit Evropian” dhe të Evropës së sotme të “Bashkimit Evropian”, janë bërë robër të “Shqipërisë së madhe”, tezë kjo e trilluar vetëm nga propaganda politike, religjioze dhe militariste e Serbisë dhe e Malit të Zi, nuk e befason sfondin e politikës dhe të opinionit gjithëshqiptar, si dhe të historiografisë objektive përparimtare ndërkombëtare ngase është recidiv i lashtë i projekteve të politikës bizantine të kolonializmit serbo-malazez. Natyrisht, se strategjia e politikës kombëtare dhe antikolonialiste shqiptare ua “vret veshin” si kolonialistëve serbomëdhenj, ashtu edhe partizanëve të tyre neokolonialistë, mirëpo ne nuk kemi tjetër alternativë politike as kombëtare përpos çlirimit antikolonial dhe mbrojtjes së ligjshme të Kosovës, përkatësisht të Shqipërisë etnike.

 

 

 

Printo Dërgo
  • di

Komente


Opinionet e fundit

arkivi i lajmeve