AI-ja kërkon drejtësi për viktimat e 10 shkurtit

Organizata ndërkombëtarë për të drejtat e njeriut, ‘Amnesty International’ (AI) i bëri thirrje të enjten komunitetit ndërkombëtar në Kosovë që të ofrojë drejtësi për familjet e Mon Balajt dhe Arben Xheladinit të vrarë në protestat e 10 shkurtit të vitit 2007 në Prishtinë. Të dy ata humbën jetën gjatë ndërhyrjes së policisë së Kombeve të Bashkuara për të shpërndarë protestat e lëvizjes Vetëvendosje, e cila kundërshtonte negociatat për statusin politik të Kosovës. Hetimet, të cilat u drejtuan nga prokurori amerikan Robert Din, vërtetuan se ata ishin qëlluar me plumba gome nga pjesëtarët rumunë të policisë së UNMIK-ut. Mirëpo, policët u kthyen në Rumani para përfundimit të hetimeve. AI-ja tërheq vërejtjen se nuk janë hapur hetime të pavarura lidhur me vrasjet dhe plagosjet e asaj dite, ndërsa hetimet e një prokurori ushtarak rumun janë mbyllur pa identifikimin e autorëve, raporton Zëri i Amerikës. AI-ja thekson po ashtu se për pesë vjet me radhë familjet e të vrarëve kërkojnë drejtësi dhe i bën thirrje Misionit të Bashkimit Evropian për policinë dhe drejtësinë që fillojnë një hetim të paanshëm dhe të pavarur. “Mungesa e vazhdueshme e hetimeve të efektshme është shkelje e të drejtave themelore të njeriut, përfshirë të drejtën për jetë, thuhet në reagimin e kësaj organizate.