Hyseni përsërit thirrjen për njohje

Ministri i Jashtëm i Republikës së Kosovës, Skënder Hyseni në vazhdën e takimeve që po zhvillon një Nju Jork, është takuar me ambasadorin e Francës dhe Italisë, ndërsa theksi është vënë në bashkërendimin e hapave dhe veprimeve që do të ndërmerren në periudhën pas mendimit të GJND-së. Në njoftimin e MPJ-së bëhet e ditur se ministri Hyseni është takuar edhe me përfaqësues të tjerë të akredituar në OKB dhe ka folur në lidhje me mendimin e GJND-së, duke ripërsëritur thirrjen për njohje. “Në takimet me ambasadorin Gerard Araud të Francës dhe Gian Lorenzo Cornado të Italisë, ministri Hyseni ka vënë theksin te nevoja dhe rëndësia e bashkërendimit të hapave dhe veprimeve që do të ndërmerren në periudhën pas mendimit të GJND-së”, bën të ditur zyra për informim e Ministrisë së Punëve të Jashtme. Këto biseda janë zhvilluar në kuadër të takimeve që ministri Hyseni është duke pasur me partnerët e shteteve të pesëshes - Kuintit, e që kanë për qëllim bashkërendimin e ngushtë të veprimeve pas mendimit këshillëdhënës të Gjykatës Ndërkombëtare të Drejtësisë. Ministri Skënder Hyseni është duke qëndruar në Nju Jork që pas deklarimit të mendimit pozitiv të GJND-së mbi ligjshmërinë e pavarësisë së Kosovës, duke kërkuar njohje të reja për shtetin tonë.

 

Emri: Komenti: KARAKTERE TE MBETURA