Kosova kërkon njohjen nga Egjipti

Gazetat kryesore të Egjiptit kanë shkruar për simpoziumin me titull “Kosova midis të kaluarës, të tashmes dhe të ardhmes”, të organizuar nga Sindikata e Gazetarëve Egjiptianë. Beqir Ismaili, këshilltari i ministrit të Jashtëm Enver Hoxhaj, i ka bërë thirrje Qeverisë së Egjiptit që ta njohë Kosovën me rastin e njëvjetorit të Pranverës Arabe. Ismaili ka prezantuar para të pranishmëve fakte historike dhe të arriturat e Kosovës që nga shpallja e pavarësisë. Në kuadër të simpoziumit është organizuar një ekspozitë e fotografive, si dhe është shfaqur një dokumentar për Kosovën. Në këtë simpozium kanë marrë pjesë përfaqësues të partive politike dhe personalitete të shumta egjiptiane, të cilët kanë bërë thirrje për shpejtimin e njohjes së Kosovës. Sipas tyre, problemi i vetëm që po pengon njohjen e Kosovës janë sfidat me të cilat po përballet vendi gjatë periudhës së tranzicionit.