Pantiq pro statusit special për veriun në kuadër të Republikës së Kosovës

I ashtuquajturi kryetar i komunës në veri të Mitrovicës, Kërstimir Pantiq, është shprehur pro statusit special për veriun në kuadër të Republikës së Kosovës.

“Meqë shpesh herë po përmendet statusi special, dhe se si ndarja e Kosovës është e pamundur, ne kemi ardhur në përfundim se një gjë e tillë mund të jetë e pranueshme në kuadër të Kosovës së pavarur”, ka thënë Pantiq.

Sipas tij, rreth çështjes së statusit special ishte dashur të jap më shumë hollësi sekretari në Ministrinë për Kosovën, Oliver Ivanoviq, i cili siç tha ai, ka tentuar t’i bind serbët ta shtynë referendumin për në vjeshtë.

Ai përsëriti se referendumi do të mbahet sipas planit të paraparë, duke mohuar kështu disa thënie se serbët e veriut kanë hequr dorë nga mbajtja e këtij referendumi. (KP)