Sparks: Do ta mbrojmë integritetin territorial të Kosovës

Zëvendësshefi i EULEX-it, Andy Sparks, ka thënë se ekzistojnë limite të caktuara deri ku mund të bisedohet për kompromisin, duke qenë se Kosova është e pavarur dhe sovrane.

Ai është shprehur se “Qëndrim i yni i fuqishëm është se Kosova është e pavarur dhe sovrane. Integritetin territorial të Kosovës, në këtë kuptim, do ta mbrojmë”, ka theksuar Sparks për FoNet, duke shtuar se serbët duhet të pranojnë fakte të caktuara, të cilat e kanë sjellë pavarësinë e Kosovës.

Ambasadori Sparks ka thënë se bisedat teknike mes Prishtinës dhe Beogradit janë të mundshme dhe të dëshirueshme, dhe se askush nuk kërkon nga Serbia që tani ta njohë Kosovën, mirëpo, sipas tij, bisedat ndërmjet dy territoreve para se gjithash do të kishin të bënin me bashkëpunimin dhe me marrëdhëniet e mira fqinjësore.

Sparks thotë se këtu do të mund të hynin edhe çështjet e bashkëpunimit ndërkufitar, të projekteve zhvillimore në të dy anët, të çështjeve për personat e zhdukur si dhe për kthimin e serbëve të zhvendosur në Kosovë.

Duke folur për “autonominë” e serbëve në veri të Kosovës, zëvendësshefi i EULEX-it ka thënë se plani i Ahtisaarit, edhe pse Serbia nuk e ka pranuar, “sjell një lloj autonomie për bashkësinë serbe në Kosovë”.