Likova kërkon vendkalim kufitar me Kosovën

RDK Kumanovë-Likovë përmes një konference për shtyp bëri të ditur se fuqimisht do të angazhohet për hapjen e vendkalimeve kufitare me Kosovën dhe Luginën e Preshevës. Sipas portalit INA, shqiptarët e Likovës dhe Kumanovës javën e kaluar e ndoqën hapjen e vendkalimit kufitar midis Maqedonisë dhe Serbisë në zonën e Kriva Pallankës, një përurim i bërë nga Qeveria aktuale ku bën pjesë edhe BDI. Kandidati për deputet i Rilindjes Demokratike Kombëtare, Selver Jashari deklaroi se, ky ishte një moment tmerrues për të gjithë ne, sepse shqiptarët në këto zona ngelëm të përbuzur dhe të mashtruar me premtimet e kota dhe të rrejshme se jo sot apo jo nesër do të hapen vendkalimet kufitare Llojan-Miratoc me Luginën e Preshevës dhe Bellanoc-Stançiq me Kosovën. Rilindja Demokratike Kombëtare, dega në Kumanovë e Likovë e vlerëson si të domosdoshme hapjen e pikave kufitare me Kosovën dhe me Luginën e Preshevës. Kjo do të ndihmonte qarkullimin e lirë të mallrave, personave, ideve dhe përfitimeve tjera në fusha të ndryshme të jetës.