Bogdanoviq: Referendumi do t’i kushtojë Serbisë

Përpjekjet e Qeverisë së Serbisë për t’i bindur që të hiqnin dorë nga mbajtja e referendumit të paralajmëruar për 14 dhe 15 shkurt, nuk i kanë bindur ilegalët e veriut. I ashtuquajturi kryetar i komunës në veri të Mitrovicës, Kërstimir Pantiq, ka thënë se nuk ka më gjasa as teorike për mos mbajtjen e referendumit, raporton RTK. Sipas tij, komisionet komunale kanë filluar tani shtypjen e fletëvotimeve, janë të gatshme të gjitha regjistrat dhe se po bëhen përgatitjet e fundit për hapjen e vendvotimeve. “Tani gjithçka është e gatshme sa i përket organizimit të referendumit dhe që sot do të mund të realizonim votimin”, ka thënë, mes tjerash, Pantiq.

Kurse sekretari në Ministrinë për Kosovën në Qeverinë e Serbisë, Oliver Ivanoviq, ka thënë se, për fat të keq, një çështje tejet e rëndësishme shtetërore është keqpërdorur. Ai ka theksuar se Qeveria e Serbisë nuk do të tentojë më t’i bind krerët e komunave në veri të Kosovës për të hequr dorë nga referendumi.

Ministri për Kosovën, Goran Bogdanoviq, ka thënë se referendumi që do të mbahet në veri të Kosovës do t’i kushtojë shtrenjtë politikisht shtetit të Serbisë. “Referendumi zbehë kredibilitetin dhe kapacitetet e shtetit serb rreth bisedimeve me Bashkësinë Ndërkombëtare. Në dëm të qytetarëve të rëndomtë, disa njerëz janë duke përfituar para këtij referendumi”, ka thënë Bogdanoviq, duke shtuar se paratë po harxhohen ndërsa qytetarët janë në prag të ekzistencës së tyre.