Francë: Miratohet ligji kundër ferexhes

Paris, 13 korrik

Parlamenti francez ka miratuar legjislacionin që nuk lejon përdorimin në publik të ferexhes dhe të veshjeve të tjera islamike që mbulojnë fytyrën.

Ministrja franceze e Drejtësisë, Mishel Aliot Mari, e cilësoi të suksesshëm votimin e së martës. “Ky është sukses për republikën dhe vlerat e saj, vlerat e lirisë, të cilat duhen mbrojtur nga çdokush që synon t’i fyejë individët dhe vlerat e barazisë mes burrave dhe grave”, tha Mari. Kundërshtarët e ligjit thonë se ai shkel të drejtat individuale dhe është antikushtetues. Ligji parasheh dënimin deri në 150 euro për shkelësit. Në Francë jeton një komunitet myslimanësh prej 5 milionë vetash - bashkësia më e madhe myslimane në Evropën Perëndimore. Sipas statistikave zyrtare, rreth 2 mijë myslimane përdorin ferexhen apo veshje të ngjashme. Ligji do të shkojë për miratim në Senat në muajin shtator.Franca është vendi i dytë në Evropë pas Belgjikës që synon të ndalojë ferexhen.