Francë, protesta kundër Sarkozit

Dhjetëra aktivistë të të drejtave të njeriut dhe organizata të ndryshme humanitare marshuan në rrugët e Parisit për të protestuar kundër, siç i quajnë ata, masave “diskriminuese racore” të presidentit Sarkozi. “Ai nuk po lufton krimin, por po vendos në udhëkryq parimin bazë të Republikës, barazinë. Tashmë ajo që në fillim u cilësua si një krizë social-ekonomike po rrezikon të transformohet në një kërcënim për të gjithë shoqërinë”, thuhet në deklaratën e përbashkët të 50 organizatave humanitare që veprojnë në Francë.

Disa organizata besojnë se fajësimi i emigrantëve prej presidentit Sarkozi për kriminalitetin në vend shkel hapur tri parimet themelore të Republikës, që janë liria, barazia dhe vëllazëria. Prej disa javësh në Francë ka nisur një operacion i cili ka dëbuar deri më tani, sipas autoriteteve, 1 mijë romë drejt Rumanisë. Dëbimi mori shkak pas sulmit që një grup romësh ndërmorën ndaj policisë.

Ndërkohë parlamenti vendas po shqyrton gjithashtu mundësinë për heqjen e shtetësisë për të gjithë emigrantët e përfshirë në sulmet ndaj policisë, poligamisë dhe prostitucionin.