Spanja ndërmjetëson për rezolutën serbe

“Bisedimet në Bruksel, që thuhet se po zhvillohen intensivisht ndërmjet BE-së dhe Beogradit për ndryshimin e rezolutës serbe për Kosovën në prag të mbledhjes së Asamblesë së Përgjithshme të OKB-së, tani janë ndërmjetësuar nga Spanja, një nga pesë vendet anëtare të BE-së, që ende nuk e kanë njohur pavarësinë e Kosovës”,- bën të ditur sot BBC-së.

Bisedimet janë përqëndruar në ndryshimin e qëndrimeve të Beogradit zyrtar ndaj mendimit të GJND-së dhe në veçanti bisedave me Prishtinën. Zyrtarë të BE-së thonë se zgjidhja më e mirë do të ishte tërheqja e plotë e rezolutës serbe, por kanë shfaqur shpresën për arritjen e një kompromisi me qeverinë serbe. Një presion diplomatik është bërë mbi Beogradin në javën e fundit, përmes ministrave të jashtëm të Gjermanisë dhe Britanisë së Madhe, që i kanë bërë me dije Serbisë se rruga e saj drejt BE-së mund të vështirësohet në rast të mosarritjes së një zgjidhjeje me Brukselin për rezolutën. Autoritetet serbe kanë bërë me dije se janë të gatshme për kompromis, por kanë këmbëngulur në qëndrimin e tyre se Rezoluta nuk mund të shkelë “vijat e kuqe” për Serbinë.